Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 222 Hüküm no: 251 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Murad’ın Osman b. Abdullah aleyhindeki hırsızlık ve darb davasından vazgeçtiği Medîne-i Hazret-i Ebî Eyyûb el-Ensârî mahallâtından Otakçıbaşı mahallesinde sâkin Mehmed b. Murad nâm kimesne mahfil-i kazâda mahalle-i merkūmede sâkin işbu bâ‘isü’l-kitâb Osman b. Abdullah tarafından ikrâr-ı âti’z-zikri tasdîka vekîl olup hasm-ı câhid mahzarında nehc-i şer‘î üzre vekâleti sâbite olan el-Hâc Seydi b. Ali nâm kimesne mahzarında takrîr-i kelâm edip târih-i kitâbdan altı ay mukaddem mahalle-i merkūmede vâki‘ menzilim bir gece açılıp ba‘zı eşyâm ahz olunup beni mecrûh eylediklerinde mezbûr Osman’ı mazanna ittihâz eyleyip da‘vâ üzre idim lâkin bu husûsda mezbûr Osman’ın sun‘u ve alâka ve medhali olmadığı her vechile mukarrer ve muhakkak olmağın terk-i da‘vâ edip husûs-ı mezbûra müte‘allik da‘vâ ve husûmâtdan zimmetini bi’l-külliye ibrâ ve iskāt eyledim min ba‘d da‘vâ ve nizâ‘ım yokdur dedikde mukırr-ı mezbûru cemî‘ ikrâr-ı meşrûhunda vekîl-i mezbûr vicâhen ve şifâhen tasdîk ve tahkīk ettikden sonra min ba‘d mâbeynlerinde mezbûr Ali’nin meclis-i şer‘a ihzâr olunmasın iktizâ eder hâl olursa, işbu hâzır bi’l-meclis olan zevcesi Fâtıma bt. Ferhad nâm hâtun mezbûr Osman’ın nefsine kefîl olup hîn-i mütâlebede meclis-i şer‘a ihzârına ta‘ahhüd etmeğin mâ vaka‘a bi’t-taleb ketb ve tahrîr olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mehmed Çelebi b. ( ), Ahmed Çelebi b. Hasan, el-Hâc Hüseyin b. ( ) el-Cündî, İbrahim Efendi b. ( ) el-İmâm, Mahmud Halîfe.