Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 223 Hüküm no: 252 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Veli’nin alacak davalısı Gülahmer bt. Abdullah ile sulh olduğu Medîne-i Hazret-i Ebî Eyyûb el-Ensârî’de beytülmâl emîni olan Mustafa Çavuş b. Veli mahfil-i kazâda medîne-i merkūme mahallâtından Aşçıbaşı mahallesinde sâkin râfi‘at-i hâze’l-kitâb Gülahmer bt. Abdullah nâm hâtun muvâcehesinde bi tav‘ihî ikrâr ve i‘tirâf edip bundan akdem fevt olup muhallefâtı beytülmâle âid ve râci‘ olan Ceyhun bt. Abdullah nâm hâtundan mezbûr Gülahmer kendi ile müşterek oldukları nısf hisse mülk menzilini, hâl-i hayâtında üç bin akçeye iştirâ edip lâkin semeni edâ eylemeyip ilâ hâzihi’l-ân zimmetinde kalmağla emânetim hasebiyle da‘vâ ve taleb eylediğimde mezbûre Gülahmer Hâtun dahi hâl-i hayâtında müteveffât-ı mezbûreye edâ eyledim deyû cevâb vermekle, beynimizde münâza‘ât-ı kesîre ve muhâsamât-ı şedîde ve ekîde vâkı‘a olmuşidi el-hâletü hâzihî muslihûn tavassut edip mâbeynimizi sekiz yüz akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm sekiz yüz akçeyi bi tamâmihî yedinden alıp kabz eyledim ba‘de’l-yevm husûs-ı mezbûre müte‘allik da‘vâ ve talebim kalmadı dedikde gıbbe’t-tasdîki’ş-şer‘î mâ hüve’l-vâki‘ ketb olundu. Hurrire fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Abdullah Efendi b. Maden el-İmâm, İsmail Çelebi b. Ahmed el-Müezzin, el-Hâc İbrahim b. Mehmed, Halil b. Yusuf, Mustafa b. Abdülahad, Mehmed b. Abdullah, Yusuf b. Abdullah, Mustafa b. Veli ve gayruhüm.