Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 219 Hüküm no: 210 Orijinal metin no: [27b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Niko’nun Dimo v. Todori’den kefaleti sebebiyle alacaklı olduğu Bakkal tâifesinden Yani v. Niko nâm zimmî tarafından husûs-ı âti’l-beyâna vekîl olduğu şer‘an sâbit olan Minho v. Niko nâm zimmî meclis-i şer‘-i şerîfde bâ‘isü’s-sifr Dimo v. Todori nâm zimmî muvâcehesinde üzerine da‘vâ ve takrîr-i kelâm edip müvekkil-i mezbûr cihet-i deyn-i şer‘îden mezbûr Dimo’nun babası Todori nâm zimmî zimmetinde hakkı olan on üç bin akçeyi ahz u kabza beni tevkîl etmekle ben dahi meblağ-ı mezbûrun sekiz bin akçesini mezbûr Todori’den ahz u kabz ettiğimden sonra bâkī beş bin akçesine oğlu mezbûr Dimo kefîl olmağın suâl olunup meblağ-ı bâkī-i mezbûr beş bin akçenin kefâletine binâen mezbûr Dimo’dan alıverilmesi matlûbumdur dedikde gıbbe’s-suâl mezbûr Dimo cevâbında meblağ-ı bâkī-i mezbûr beş bin akçeye vech-i muharrer üzre kefîl olduğumdan sonra meblağ-ı bâkī-i mezbûrun dört bin beş yüz akçesi için vekîl-i mezbûr Minho’ya târih-i kitâbdan beş gün mukaddem onu bir guruşluk dört yüz elli sümün verip edâ edip ol dahi kabz etmişidi deyû müdde‘î-i mezbûru ba‘zı da‘vâsında def‘ ile mukābele edicek gıbbe’s-suâl ve’l-inkâr mezbûr Dimo’dan def‘-i mezbûrunu mübeyyine beyyine taleb olundukda mahmiye-i İstanbul hısnı ebvâbından Balatkapısı hâricinde Hacı İsa mahallesi sükkânından Panayot v. Kostantin ve Zeyrek mahallesi sükkânından yoğurtçu Panayot v. Nikola ve Eyüb’de Çömlekçiler mahallesi sükkânından Yani v. Dimo nâm zimmîler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Dimo vech-i muharrer üzre müvekkil-i mezbûra cihet-i kefâletden deyni olan beş bin akçenin dört bin beş yüz akçesi için vekîl-i mezbûra onu bir guruşluk dört yüz elli sümününü târih-i kitâbdan dört gün mukaddem bizim huzûrumuzda edâ ve teslîm edip ol dahi ahz ve istîfâ etmiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı bâkī-i mezbûr beş bin akçeden bâkī beş yüz akçeyi vekîl-i mezbûra edâya merkūm Dimo’ya tenbîh olunup dört bin beş yüz akçesini da‘vâdan vekîl-i mezbûr Minho men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Receb Çavuş el-Mübâşir, Şükrullah Bey b. Mustafa, Abdi Çelebi b. Hüseyin, Resul b. Rıdvan.