Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 223 Hüküm no: 253 Orijinal metin no: [41b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hatun bt. Osman’ın tarlasının kullanım hakkını Mehmed b. Hacı Abdünnebi’ye devrettiği Mahmiye-i Kostantıniyye hısnı ebvâbından Yedikule kapısı dâhilinde Bucak mahallesinde sâkine Hatice Hâtun bt. Osman meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed b. el-Hâc Abdünnebi mahzarında bi tav‘ihâ ikrâr ve takrîr-i kelâm edip Havâss-ı Aliyye kazâsı müzâfâtından Küçükçekmece nâhiyesine tâbi‘ Fîruzköyü demekle ma‘rûfe karye sınırında vâki‘ üç tarafdan Lankazâde Abdullah Bey tarlası ve bir tarafdan Mustafa Efendi tarlası ile mahdûd tahmînen on üç keyl tohum istî‘âb eder merhûm ve mağfûrun-leh Sultan Bayezid Hân arâzisinden olup taht-ı tasarrufumda olan bir kıt‘a tarlamın hakk-ı tasarrufunu, sâhib-i arz ma‘rifetiyle mezbûr Mehmed’e yirmi beş aded riyâlî guruş mukābelesinde tefvîz edip ol dahi minvâl-i muharrer üzre tefevvuz ve kabûl eyledikden sonra bedel-i tefvîz olan meblağ-ı mezbûr yirmi beş aded riyâlî guruşu mezbûr Mehmed yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’z-zikr tarla mezbûr Mehmed’in dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâlis ve’l-ışrîn min şehri Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Ahmed b. Abdullah, İlyas b. ( ), Bayram b. ( ), Hızır Beşe b. Abdullah, Veli Bey b. Abdullah, Hasan Beşe b. İbrahim, Mehmed b. Ahmed.