Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 224 Hüküm no: 254 Orijinal metin no: [41b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Himmet’in miras hissesini Emine bt. Allahverdi’ye sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Kiremitçi Süleyman mahallesi sükkânından olup bundan akdem tarîk-i hacda vefât eden Rıdvan b. Abdullah nâm müteveffânın verâseti zevce-i metrûkesi Emine bt. Allahverdi nâm hâtuna ve mu‘takı Osman b. Himmet nâm kimesneye münhasıra olduğu şer‘an zâhir ve mütehakkik oldukdan sonra mezbûr Osman mahfil-i kazâda mezbûre Emine Hâtun tarafından ikrâr-ı âti’z-zikri tasdîka vekîl olup mezbûreyi ma‘rifet-i şer‘iyye ile ârifeyn olan [42a] Mustafa Halîfe b. Mehmed el-Mu‘allim ve Veli Beşe b. Mustafa şehâdetleri ile şer‘an vekâleti sâbite olan babası mezkûr Allahverdi muvâcehesinde bi tav‘ihî ikrâr ve takrîr-i kelâm edip mu‘takım ve mûrisim müteveffâ-yı mezbûrun zevcesi merkūme Emine Hâtun yedinde cümle muhallefâtından bi hasebi’ş-şer‘î bana âid olan selâse erbâ‘ hisse-i şer‘iyyem mukābelesinde mezbûre Emine Hâtun yedinden alâ tarîki’t-tehârüci’ş-şer‘î otuz üç bin akçe alıp kabz eyledim ba‘de’l-yevm müteveffâ-yı mezbûrun mîrâsına müte‘allik mezbûre Emine Hâtun ile da‘vâ ve nizâ‘ım kalmadı eğer ba‘de’l-yevm benden husûs-ı mezbûra müte‘allik da‘vâ dahi sudûr ve zuhûr ederse lede’l-hükkâm zevi’l-ihtirâm mesmû‘a ve makbûle olmaya dedikde mukırr-ı mezbûr Osman’ın ikrâr-ı meşrûhunu vekîl-i mezbûr Allahverdi bi’l-vekâle vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’r-râbi‘ ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Receb Efendi b. Abdi, el-Hâc Yusuf b. Hüsam ve Hüseyin Çelebi b. Hasan, Abdurrahman Çelebi b. ( ) el-Hammâmî, Ahmed Bey b. Haydar, el-Hâc Yusuf b. Hasan, Mahmud b. Ahmed ve gayruhüm.