Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 225 Hüküm no: 256 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hüseyin b. Yusuf’un vakıf arsasının bir kısmını Cemile bt. Piri Dede’ye devrettiği Medîne-i Hazret-i Ebî Eyyûb el-Ensârî mahallâtından Fethi Çelebi mahallesinde sâkin el-Hâc Hüseyin b. Yusuf nâm kimesne mahfil-i kazâda mahalle-i merkūmede sâkine işbu bâ‘isetü’l-kitâb Cemile bt. Pîrî Dede nâm hâtun tarafından ikrâr-ı âti’z-zikri tasdîka vekîl olup hasm-ı câhid mahzarında nehc-i şer‘î üzre vekâleti sâbite olan oğlu Ahmed Çelebi b. Kasım mahzarında ikrâr ve takrîr-i kelâm edip mahalle-i merkūmede vâki‘ gallesi ve tevliyyeti mahalle-i merkūme imâmına meşrûta olup icâre-i mu‘accele ve her bir senede altmışar akçe icâre-i müeccele ile mutasarrıf olduğum bir tarafı mezbûre Cemile Hâtun mülkü ve bir tarafı Abdullah nâm kimesne mülkü ve bir tarafı Mustafa Efendi mülkü ve bir tarafı tarîk-i âm ile mahdûd tûlen on zirâ‘ ve arzen iki zirâ‘ arsadan Mustafa Efendi tarafından tûlen üç zirâ‘ ve arzen iki zirâ‘ arsamı kendi nefsim için dükkân ihdâs etmekle alıkoyup mâ‘adâ tûlen yedi zirâ‘ ve arzen iki zirâ‘ arsanın hakk-ı tasarrufu beher sene zikr olunan altmış akçe icâre-i müeccelenin kırk akçesin edâ edip yirmi akçesin merkūme Cemile Hâtun edâ eylemek üzre sekiz yüz nakd-i râyic fi’l-vakt fıddî akçe mukābelesinde mezbûre Cemile Hâtun’a izn-i mütevellî ile ferâgat eyleyip meblağ-ı mezbûr sekiz yüz akçeyi yedinden bi’t-tamâm ve’l-kemâl ahz ve kabz eyledim dedikde vekîl-i mezbûr Ahmed Çelebi vicâhen tasdîk ve şifâhen tahkīk etmeğin mâ hüve’l-vâki‘ ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mehmed b. Abdi er-Râcil, Mehmed b. Murad, Mehmed b. Abdullah, Mehmed b. Osman, Mahmud b. İbrahim, Murtaza b. Abdullah, Ahmed b. Hasan, Mahmud b. Ahmed, Mustafa b. Veli, Cafer b. Abdullah ve gayruhüm.