Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 226 Hüküm no: 257 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın bağını Hasan Bey b. Ahmed’e sattığı Vilâyet-i Rumeli’nde Opar kazâsına tâbi‘ Melek nâm karye sâkinlerinden Mehmed Bey b. Abdullah meclis-i şer‘-i hatîr-i lâzımü’t-tevkīrde kazâ-i mezbûre tâbi‘ Granova nâm karye sâkinlerinden işbu hâmiletü’l-kitâb Hasan Bey b. Ahmed nâm kimesne mahzarında bi’t-tav‘i’s-sâf ikrâr ve i‘tirâf edip karye-i mezbûre mülk sınırı dâhilinde ve Lahova nâm mevzi‘de vâki‘ iki tarafdan Mustafa bağı ve bir tarafdan vakıf bağ ve bir tarafdan ba‘zan Keto nâm zimmî bağı ve ba‘zan dere ile mahdûd tahmînen on çapalık bir kıt‘a mülk bağımı mezbûr Hasan Bey’e fıddî nakd-i râyic fi’l-vakt bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr bin beş yüz akçeyi bi’t-tamâm ve’l-kemâl [42b] mezbûr Hasan Bey yedinden ahz ve kabz edip mebî‘-i mezbûru mahallinde ahz ve tesellüme mezbûr Hasan Bey’i taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Şeyh Mehmed Bey b. Abdullah, İbrahim Çelebi b. Mehmed, Mustafa Beşe b. ( ), Yusuf Beşe b. ( ), Hasan Bey b. Ahmed, Mahmud b. Ahmed.