Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 226 Hüküm no: 258 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlyas Beşe b. Sefer’in değirmenini Yusuf b. Mehmed’e sattığı Vilâyet-i Rumeli’nde Opar kazâsına tâbi‘ Nikarlı nâm karyeden olup hâlâ mahmiye-i İstanbul’da Hâssa bostancılarından olan İlyas Beşe b. Sefer nâm kimesne mahfil-i kazâda işbu hâmilü’l-kitâb Yusuf b. Mehmed nâm kimesne mahzarında bi’t-tav‘i’s-sâf ikrâr ve i‘tirâf edip karye-i mezbûre kurbunda vâki‘ Dolu demekle ma‘rûf nehir üzerinde dâyir Hasan b. Abdullah nâm kimesne ve Andriye v. Kiko nâm zimmî değirmenleri miyânında ve sakf-ı vâhid altında vâki‘ bir göz mülk un değirmeni ocağını zikr olunan mahalden kaldırıp yirmi zirâ‘ aşağıda ahlad ağacı kurbunda müstakil binâ ihdâs etmek üzre mezbûr Yusuf’a fıddî nakd-i râyic fi’l-vakt beş bin iki yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr Beş bin iki yüz akçeyi mezbûr Yusuf yedinden bi’t-tamâm ahz ve kabz edip mebî‘-i mezbûru mahallinde zabt ve tasarrufa mezbûr Yusuf’u taslît eyledim dedikde mukırr-ı mezbûr İlyas Beşe’nin minvâl-i muharrer üzre cârî olan ikrârını el-mukarru lehü’l-merkūm Yusuf vicâhen ve şifâhen tasdîk ve tahkīk etmeğin mâ vaka‘a gıbbe’t-taleb ketb olundu. Târihuhü’l-mezbûr. Şuhûdü’l-hâl: Mustafa [b.] Ali an karye-i Granova, Ali b. Mehmed Katravî, Hasan b. Ahmed, Hasan b. Abdullah, Kasım b. Abdullah, Hüseyin b. Abdullah, İbrahim b. Abdullah, Cebeci Mehmed, Mehmed b. Abdullah.