Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 227 Hüküm no: 260 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aruş v. Narek’den miras bağın kızı Tamik’e ait olduğu Vilâyet-i Anadolu’da Eğin kazâsına tâbi‘ Çorak nâm karyeden olup hâlâ Havâss-ı Aliyye kazâsı müzâfâtından Hasköy’de Abdüsselâm mahallesinde sâkin iken mürd olan Aruş v. Narek nâm zimmînin verâseti sulbiye kebîre kızları Kefar ve Tamik’e münhasıra olduğu şer‘an zâhir ve mütebeyyin oldukdan sonra mezbûre Kefar mahfil-i kazâda işbu hâmilü’s-sifr mezbûre Tamik muvâcehesinde bi tav‘ihâ ikrâr ve takrîr-i kelâm edip babam hâlik-i mezbûr Aruş hâl-i hayâtında kazâ-i mezbûre tâbi‘ Vank nâm karye sınırında vâki‘ bir tarafdan Cafer b. Abdullah bağı ve bir tarafdan Keşiş bağı ve bir tarafdan mâ-i cârî ve bir tarafdan tarîk-i âm ile mahdûd bir kıt‘a mülk bağını karındaşım mezbûre Tamik’e hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabûl ve kabz eyledi sâlifü’z-zikr olan bağda benim alâkam ve medhalim yokdur, karındaşım mezbûre Tamik’in mülk-i mevhûbudur dedikde gıbbe’t-tasdîki’ş-şer‘î mâ vaka‘a gıbbe’t-taleb ketb olundu. Tahrîren fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Süleyman Halîfe b. Murad el-İmâm, Muzaffer Bey b. Abdullah, lağımcı Hüseyin b. ( ), Yahya Çelebi b. ( ), Mehmed b. Abdullah, Mahmud b. Ahmed, Ali b. Mustafa, Ali b. Abdullah, Mustafa b. Veli ve gayruhüm.