Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 228 Hüküm no: 261 Orijinal metin no: [42b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın menzil, bağ ve tarlalarını İlyas Beşe’ye devrettiği Vilâyet-i Rumeli’nde Opar kazâsına tâbi‘ Melek nâm karye sâkinlerinden Mehmed Bey b. Abdullah mahfil-i kazâda Hâssa bostancılarından işbu hâmilü’l-kitâb İlyas Beşe b. ( ) mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Mehmed Bey b. Abdullah mülkü ve bir tarafdan Mahmud Bey b. ( ) mülkü ve bir tarafdan Pito v. Roso nâm zimmî mülkü ve bir tarafdan tarîk-i âm ile mahdûd menzil yerini ve yine eşcâr-ı müsmire ve gayr-ı müsmireyi hâvî bostan yerini ve bir samanlığı ve harman yerini müştemil olup bundan akdem Kasım nâm kimesneden iştirâ eylediğim mülk menzil yerini ve mevâzi‘-i müteferrikada vâki‘ lede’l-ahâlî ve’l-cîrân ma‘lûmü’l-hudûd üç çapalık mülk bağımı ve yine karye-i mezbûrede vâki‘ tahdîd ve tavsîfden müstağnî babamdan irs-i şer‘le intikāl eden mülk menzil yerimi ve inde’l-ahâlî ma‘lûmü’l-hudûd Kirazlık ve Bekçiler ve Ploşin nâm mevâzi‘de [43a] vâki‘ üç kıt‘a mülk bağımı cümle tevâbi‘ ve levâhıkı ile mezbûr İlyas Beşe’ye fıddî nakd-i râyic fi’l-vakt dört bin dört yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûre sınırında mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd Kasım nâm kimesneden tefevvuz eylediğim ve babamdan intikāl-i âdî ile intikāl edip taht-ı tasarrufumda olan tarlalarımın dahi hakk-ı tasarruflarını sâhib-i arz ma‘rifetleriyle mezbûr İlyas Beşe’ye bin beş yüz akçe mukābelesinde tefvîz edip ol dahi tefevvuz ve kabûl eyledikden sonra semen-i mezbûr dört bin dört yüz akçe ile bedel-i tefvîz olan bin beş yüz akçe ki cem‘an beş bin dokuz yüz akçeyi mezbûr İlyas Beşe yedinden tamâmen alıp kabz edip mebî‘-i mezbûru mahallinde ahz ve kabz [ve] tesellüme ve tarlaları zabt ve tasarrufa mezbûr İlyas Beşe’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mustafa b. Ali Granova’dan, Ali b. Mehmed Katra’dan, Hasan b. Abdullah an karye-i mezbûr, Hasan b. Abdullah an karye-i Nifsali, Kasım b. Abdullah, Hüseyin b. Abdullah, İbrahim b. Abdullah, Cebeci Mehmed, Mehmed b. Abdullah, Kasım b. Abdullah, Yusuf b. Abdullah, Ahmed Beşe, İlyas b. Yusuf, Hasan b. Yusuf ve gayruhüm.