Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 229 Hüküm no: 262 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Deriş v. Narek’den miras menzil hissesinin kızı Kefar’a ait olduğu Vilâyet-i Anadolu’da Eğin kazâsına tâbi‘ Çorak nâm karyeden olup hâlâ Havâss-ı Aliyye kazâsı müzâfâtından Hasköy’de Abdüsselâm mahallesinde sâkin iken mürd olan Deriş v. Narek nâm zimmînin verâseti sulbiye kebîre kızları Kefar ve Tamik’e münhasıra olduğu şer‘an zâhir ve mütebeyyin oldukdan sonra mezbûre Tamik mahfil-i kazâda işbu hâmiletü’l-kitâb mezbûre Kefar muvâcehesinde bi tav‘ihâ ikrâr ve i‘tirâf edip babam hâlik-i mezbûr Deriş hâl-i hayâtında Havâss-ı Aliyye müzâfâtından Hasköy’de Abdüsselâm mahallesinde vâki‘ bir tarafdan lağımcı Hüseyin mülkü ve bir tarafdan ba‘zan Musa Efendi ve ba‘zan Ali Ağa mülkü ile ve bir tarafdan tarîk-i âm ve bir tarafdan mer‘â ile mahdûd ve eşcâr-ı müsmire ve gayr-ı müsmire hadîkayı müştemil Mıgırdiç nâm zimmî ile ale’l-iştirâki’s-seviy müşterek oldukları mülk menzilden nısf hisse-i şâyi‘asını karındaşım mezbûre Kefar’a hibe-i sahîha-i şer‘iyye ile hibe ve temlîk ve teslîm eylemişdir sâlifü’z-zikr olan menzilde benim alâkam ve medhalim yokdur mezbûre Kefar’ın mülk-i mevhûbudur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min Şa‘bâni’l-mu‘azzam târihuhu’l-mezbûr. Şuhûdü’l-hâl: Süleyman Halîfe b. Murad el-İmâm, Mustafa Bey b. Abdullah, Hüseyin b. Abdullah, Yahya Çelebi b. ( ), Mahmud b. Ahmed, Mustafa b. Veli, Ali b. ( ).