Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 229 Hüküm no: 263 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın menzilini eşi Rahime bt. Mehmed’e hibe ettiği Medîne-i Hazret-i Ebî Eyyûb el-Ensârî mahallâtından Zeyneb Hâtun mahallesi sâkinlerinden Mustafa b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb zevcesi Rahime bt. Mehmed nâm hâtun mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Hallâc Ebûbekir vakfı olan menzil ve bir tarafdan vâdi ve bir tarafdan kendi mülküm ve bir tarafdan tarîk-i âm ile mahdûd bir bâb tahtânî beyti ve sofayı ve zât eşcâr-ı müsmire ve gayr-ı müsmire hadîkayı ve iki bi’r-i mâyı müştemil mülk menzilimi, cümle-i tevâbi‘ ve levâhıkı ile zevcim mezbûre Rahime’ye hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabûl ve kabz ve tesellüm eyledi ba‘de’l-yevm sâlifü’z-zikr menzil zevcem mezbûre Rahime’nin mülk-i mevhûbu olmuşdur. Keyfe mâ teşâ’ ve tahtâr mutasarrıf olsun dedikde mukırr-ı mezbûr Mustafa’nın minvâl-i meşrûh üzre cârî olan ikrârında el-mukarru lehâ’l-mezbûre Rahime vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Murad De[de] b. Abdullah, Mustafa Halîfe b. ( ) el-İmâm, Halil b. Haydar, Mehmed b. Veli, Ömer b. Gülâbî, Hasan Efendi, Mehmed Çelebi b. Hasan, Osman b. İbrahim, Mehmed Dede ve gayruhüm.