Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 231 Hüküm no: 266 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultana’nın annesi Malka bt. Milohay’dan intikal eden hissesini diğer varislerden teslim aldığı Havâss-ı Kostantıniyye kazâsı müzâfâtından Hasköy demekle ma‘rûfe olan karyede sâkine iken hâlike olan Malka bt. Milohay nâm Yahudiyenin verâseti zevci Hayim v. Yakob ile sadrî oğulları Yakob ve Mosi ve Milohay ve Yahuda’ya ve sadriye kebîre kızları Soli ve Parla ve Sultana’ya münhasıra olduğu şer‘an mütebeyyin ve metrûkâtının kırk dört sehimden on bir sehmi mezbûr Hayim’e ve altışar sehmi merkūmûn Yakob ve Mosi ve Milohay ve Yahuda’ya ve üçer sehmi mezbûrât Soli ve Parla ve Saltan’a müntakile olduğu mütebeyyin oldukdan sonra mezbûre Saltan tarafından husûs-ı âti’z-zikri ikrâra vekîl olup hasm-ı câhid mahzarında Menahem v. Menahem ve İlya v. Nikon şehâdetleri ile şer‘an vekâleti sâbite olan Yasef v. Davud nâm Yahudi mahfil-i kazâda mezbûre Malka’nın muhallefâtına vâzı‘ü’l-yed olan işbu bâ‘isü’l-kitâb zevci merkūm Hayim muvâcehesinde bi’l-vekâle ikrâr ve i‘tirâf edip müvekkilem merkūme Saltan’a anası hâlike-i merkūmenin İstanbul içinde olan dekâkîn ve mahzen ve sâir terekesinden ve Hasköy’de vâki‘ olan cemî‘ menkūlât ve esâs-ı beyt ve akārâtından sihâm-ı mezbûreden bi hasebi’l-irsi’ş-şer‘î kendine isâbet eden üç sehim hisse-i şer‘iyyesini babası merkūm Hayim yedinden bi’t-tamâm ve’l-kemâl ahz ve kabz eyleyip anası mezbûre Malka’nın muhallefâtından vech-i meşrûh üzre kendine isâbet eden hissesinden babası Hayim yedinde bir akçe ve bir habbe hakkı kalmamışdır dedikde mezbûr Yasef’in minvâl-i meşrûh üzre bi’l-vekâle cârî olan ikrârını mezbûr Hayim bi’l-muvâcehe tasdîk ve bi’l-müşâfehe tahkīk etmeğin mâ vaka‘a gıbbe’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene selâse ve erba‘în ve elf. Şuhûdü’l-hâl: Mahmud Bey b. ( ) es-Sarrâcü’s-sultânî, Mustafa Çelebi b. ( ), el-Hâc Behram b. Abdullah, Ali b. Abdullah, Papase [v.] Brazer, Yahuda v. Avraham, Fahim v. Manil?