Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 231 Hüküm no: 267 Orijinal metin no: [43b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâssa Bostancılarından Hasan Ağa’nın Avasya köylü Kara Yorgi ve köy ahalisi aleyhindeki davasından vazgeçmesi Hâssa bostancılardan kıdvetü’l-emâsil ve’l-akrân Hasan Ağa -zîde kadruhû- mahfil-i kazâda Havâss-ı Refî‘a kazâsı müzâfâtından Avasya nâm karye sâkinlerinden Kara Yorgi v. İstati nâm zimmî ve sâir ahâlî-i karye mahzarlarında ikrâr ve takrîr-i kelâm edip Eflak vilâyetinde Dimo nâm zimmî yedinde olan yüz altmış beş bin akçemi vilâyet-i merkūmeden mezbûr Dimo getirir iken karye-i mezbûrede merkūm Kara Yorgi’nin menzilinde zâyi‘ olduğu mesmû‘um olmağla mezbûr Kara Yori’den ve oğlu Yani’den ve hizmetkârı Kömürcü nâm zimmîden ve sâir ahâlî-i karyeden da‘vâ üzre idim el-hâletü hâzihî meblağ-ı merkūm hâlâ dahi vilâyet-i merkūmede mezbûr Dimo yedinde olduğu ma‘lûmum olmağla terk-i da‘vâ eyleyip mezbûrûn Kara Yorgi ve oğlu Yani ve hizmetkârı Kömürcü ve sâir ahâlî-i karyeden vechen mine’l-vücûh min ba‘d da‘vâ ve nizâ‘ım yokdur dedikde mezbûr Hasan Ağa’nın vech-i muharrer üzre cârî olan ikrâr ve takrîri mezbûr Kara Yorgi ve karye-i mezbûre ahâlîsi her biri vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Ali Efendi b. Zeynelâbidin, Mustafa Halîfe b. Yusuf, Mustafa Beşe b. İbrahim, Mustafa Beşe b. ( ) ve gayruhüm.