Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 232 Hüküm no: 268 Orijinal metin no: [43b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Bey b. Abdullah’ın menzilini ve tarlalarını Derviş Bey b. Mustafa’ya sattığı Mahmiye-i İstanbul’da merhûm Koca Mustafa Paşa câmi‘-i şerîfi kurbunda vâki‘ Hacce Hâtun mahallesinde sâkin Yahya Bey b. Abdullah nâm kimesne mahfil-i kazâda mahmiye-i merkūmede Ali Fakīh mahallesinde sâkin râfi‘ü hâze’l-kitâb kıdvetü’l-emâsil ve’l-akrân bi’l-fi‘l Bezzâzistân-ı atîk kethüdâsı olan Derviş Bey b. Mustafa nâm râcil mahzarında bi’t-tav‘i’s-sâf ikrâr ve i‘tirâf edip Havâss-ı Refî‘a kazâsı müzâfâtından Küçükçekmece nâhiyesine tâbi‘ İncirli nâm karyede vâki‘ bir tarafı eş-Şeyh Osman Çelebi Efendi mülkü ve bir tarafı Hasan Beşe mülkü ve bir tarafı Mansur nâm kimesne mülkü ve bir tarafı tarîk-i âm ile mahdûd olup muhavvata-i dâhiliyyesi iki bâb tahtânî odayı ve bir mikdâr hadîkayı ve muhavvata-i hâriciyyesi iki bâb tahtânî odaları ve bir çardağı ve altında iki bâb odaları ve iki gözlü bir çatma anbarı ve bir ahır ve bir samanlığı ve kenîfi ve tahmînen iki dönüm bağı ve bi’r-i mâyı ve havlu hâricinde vâki‘ bir bâb fevkānî odayı müştemil çiftlik ta‘bîr olunur mülk menzilimi, cümle-i tevâbi‘ ve levâhıkı ile ve bir çift kara [44a] sığır öküzü ve bir araba ve sâir âlât-ı zirâ‘at ve âsiyâb-ı hırâseti merkūm Derviş Bey’e tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile kırk iki bin nakd-i râyic fi’l-vakt fıddî akçeye bey‘ ve teslîm edip ol dahi vech-i muharrer üzre iştirâ ve tesellüm eyledikde karye-i mezbûre sınırında vâki‘ merhûm Sultan Bayezid-i Velî -tâbe serâhû- evkāfı arâzisinden olup kadîmden zikr olunan çiftlik ile mutasarrıf olduğum tahmînen yüz keyl tohum istî‘âb eder lede’l-ahâlî ma‘lûmü’l-hudûd olan sekiz kıt‘a tarla ki bir kıt‘ası karye-i merkūme İncirli kurbunda iki dip ceviz ağacı ve bir harman yerini müştemil ve dört kıt‘ası dahi Siyavuş Paşa Çiftliği kurbunda mevâzi‘-i müteferrikada ve bir kıt‘ası dahi karye-i mezbûre İncirli ile Soğanlı köyü demekle ma‘rûfe olan karye mâbeyninde ve bir kıt‘ası yine karye-i merkūme İncirli ile Makrahorya nâm karye mâbeyninde ve bir kıt‘a dahi Taşlık nâm mevzi‘de vâki‘ olup cem‘an zikr olunan sekiz kıt‘a tarlaların hakk-ı tasarruflarını evkāf-ı mezbûre mütevellîsi ma‘rifetiyle on sekiz bin mezbûrü’n-na‘t akçe mukābelesinde tefvîz edip ol dahi vech-i meşrûh üzre tefevvuz ve kabûl ettikden sonra bedel-i tefvîz olan meblağ-ı mezbûr on sekiz bin akçe ile menzil-i mezbûrun semeni olan kırk iki bin akçe ki cem‘an altmış bin akçe eder merkūm Derviş Bey yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûr merkūm Derviş Bey’in mülk-i müşterâsı ve mezâri‘-i merkūme dâhil-i taht-ı tasarrufu olmuşdur dedikde mukırr-ı mezbûr Yahya Bey’in ber vech-i meşrûh cârî ve sâdır olan ikrâr ve i‘tirâfını el-mukarru lehü’l-merkūm Derviş Bey vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Hurrire fî selhi Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Eş-Şeyh Osman Efendi, Hasan Efendi el-İmâm, Mehmed Halîfe b. Abdullah el-Müezzin, Fahrü’l-akrân Kurd Ağa Ser-bostânân-ı sâbıkan, Kurd Ağa el-Cündî, Çâker Çavuş b. Abdullah, Hasan Beşe b. Ali er-Râcil, Hasan Çelebi b. Mehmed, Ömer Bey b. Hasan, Hasan Bey b. Abdullah, Musa b. Veli, Osman b. Receb, Muharrirü’l-hurûf Abdülkādir el-Eyyûbî ve gayruhüm.