Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 233 Hüküm no: 269 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri, Yanaki, Arma ve Todori’nin, Dilaver Bey b. Abdullah’ın evini basarak bazı eşyalarını çaldıklarını itiraf etmeleri Mahmiye-i Galata müzâfâtından kasaba-i Kasımpaşa sükkânından bâ‘isü’l-kitâb Dilâver Bey b. Abdullah nâm kimesne mahfil-i kazâda takrîr-i kelâm edip târih-i kitâb şehrinin yirmi dördüncü vâki‘ olan ahad gecesi kasaba-i merkūmede sâkin olduğum menzilimi ben hâzır değil iken cevf-i leylde harâmîler basıp mevcûd olan cemî‘ eşyâmı gāret etmişler deyip Havâss-ı Aliyye kazâsında işbu târih-i kitâb gecesi ahz olunup hâzır bi’l-meclis olan Yanaki v. Likor ve Arma v. Nikola ve Todori v. Viko nâm şakīlerden suâl olunsun deyip mezbûrların her biri istintâk olundukda, cevâblarında gāib ani’l-meclis olan Petro ve diğer Todori ve Petro Şakan nâm zimmîler ve hâlâ mahmiye-i Kostantıniyye’de Saraçhâne’de sâkin Dimitri nâm zimmî ile cem‘an yedi nefer zimmî leyle-i merkūmede varıp, mezbûr Dilâver Bey’in menzilini basıp mevcûd bulunan eşyâsını nehb ve gāret eyledik deyicek mezbûr Sarrâc Dimitri dahi ahz olunup istintâk olundukda, mezbûrûn Petro ve diğer Todori ve Petro Şakan hemşehrilerim olmağla ekser eyyâmda dükkânıma gelirleridi mezbûr Dilâver Bey’in evi açılmazdan beş altı gün mukaddem yine gelip benimle sâkin olurlar iken beni dahi idlâl edip cem‘an yedi nefer zimmî varıp merkūm Dilâver Bey’in menzilini basıp mevcûd bulunan eşyâsını nehb ü gāret ettik deyû mezbûrûn Dimitri ve Yanaki ve Arma ve Todori bi’t-tav‘i’s-sâf ikrâr ve i‘tirâf etmekle ol ki vâki‘ hâldir vukū‘u üzre ketb ve imlâ olundu. Tahrîren fî evâhiri Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Cafer b. Abdullah, Yakub b. Kurd, Mustafa b. Veli, Ali b. Mustafa, Mustafa b. Mehmed.