Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 234 Hüküm no: 270 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Yani’nin bağını Manol v. İstamo’ya sattığı Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ nefs-i Fener sâkinlerinden Manol v. Yani eş-şehîr bi Papasoğlu nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sükkânından işbu hâmilü’s-sifr Manol v. İstamo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre sınırı dâhilinde Doçkuzu nâm mevzi‘de vâki‘ bir tarafdan Hamza Bey bağı ve bir tarafdan Manol v. Apostol bağı ve bir tarafdan Torkişo v. Rizo bağı ve bir tarafdan Aleksi v. Markari bağı ile mahdûd olup eşcâr-ı müsmire ve gayr-ı müsmireyi ve bir şırahâneyi ve mezbûr Manol bağı tarafında pelit ağacı üzerinde bir dip üzüm asmasını müştemil olan tahmînen üç dönüm mülk bağımı cümle tevâbi‘ ve levâhıkı ile mezbûr Manol’e fıddî nakd-i râyic fi’l-vakt üç bin iki yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr üç bin iki yüz akçeyi mezbûr Manol yedinden tamâmen alıp kabz edip mebî‘-i mezbûru mahallinde zabt ve tasarrufa mezbûr Manol taslît eyledim ba‘de’l-yevm zikr olunan bağ-ı mezbûr Manol’ün mülk-i müşterâsıdır dedikde gıbbe’t-tasdîki’ş-şer‘î bi’t-taleb ketb olundu. Fî gurreti Ramazâni’l-mübârek li sene seb‘a ve erba‘în ve elf. Şuhûdü’l-hâl: Mustafa b. Osman, Ali Çelebi b. ( ), Mustafa Çelebi ( ), Yani [v.] Yorgo, Kasdirde [v.] Paris, kiremitçi Şimo, Dimo [v.] İlyamo (…), Ermaka [bt.] İstamo, Hristo [v.] İstarmo, Yorgo [b.] Kozma, Paroş.