Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 234 Hüküm no: 271 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimitri’nin müşterek değirmen hissesini Aleksi v. Lino’ya sattığı Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Petril nâm karye sâkinlerinden Yani v. Dimi nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu hâmilü’s-sifr Aleksi v. Lino nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre kurbunda Toru ve İslemeki nâm nehr-i cârî üzerinde dâyir Noki Apostol değirmeni ve Tahti Kavala nâm zimmî değirmeni ile mahdûd Hristo v. Apostol nâm zimmî ile ale’l-iştirâki’s-seviy müşterek olduğum bir göz mülk un değirmeninden nısf hisse-i şâyi‘amı ve değirmen kurbunda bir mikdâr ma‘lûmü’l-hudûd arz-ı hâliyeden nısf hisse-i şâyi‘amı, mezbûr Aleksi’ye fıddî nakd-i râyic fi’l-vakt dört bin dört yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr dört bin dört yüz akçeyi bi’t-tamâm ve’l-kemâl mezbûr Aleksi yedinden alıp kabz edip mebî‘-i mezbûru mahallinde zabta ve tasarrufa mezbûr Aleksi’yi taslît eyledim ba‘de’l-yevm mârrü’z-zikr değirmenin nısf-ı şâyi‘i mezbûr Aleksi’nin mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihuhü’l-mezbûr. Dima v. Maryo, Plorav [v.] Yani, Paroş v. Kara, Diyako [v.] Meşta, İstati [v.] Şimo, Papa [v.] Yani, Lino [v.] Dimitri, Yani [v.] Paroş, Diyakomi ve gayruhüm.