Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 238 Hüküm no: 277 Orijinal metin no: [45a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Verano v. Kiryaki’nin Hüseyin Çelebi b. Mustafa aleyhindeki alacak iddiasında haksız olması Mahmiye-i Kostantıniyye sûru ebvâbından Hazret-i Ebî Eyyûb el-Ensârî kapısı dâhilinde sâkin Verano v. Kiryaki nâm zimmî mahfil-i kazâda işbu bâ‘isü’l-kitâb Hüseyin Çelebi b. Mustafa mahzarında üzerine takrîr-i da‘vâ edip mezbûr Hüseyin Çelebi’ye sefere gitmezden mukaddem cinsi ve nev‘i beynimizde ma‘lûm iki bin akçelik kereste bey‘ ve teslîm edip ol dahi iştirâ ve tesellüm eylemişidi hâlâ meblağ-ı mezbûrun dört yüz on akçesin yedinden ahz ve kabz edip bâkī bin beş yüz doksan akçe hakkımı da‘vâ ve taleb ederim suâl olunsun dedikde gıbbe’s-suâl mezbûr Hüseyin Çelebi ben mezbûr Verano’dan ancak dört yüz on akçelik kereste iştirâ edip gittiğimden sonra vâlidem Meryem bt. Abdullah dahi beş yüz akçelik kereste almağın cem‘an dokuz yüz on akçeyi mezbûra bi’t-tamâm edâ eyledim deyip ziyâde kereste aldığını inkâr ile cevâb vermeğin, müdde‘î-i mezbûrdan da‘vâsına mutâbık beyyine taleb olundukda ityân-ı beyyineden âciz olup mezbûr Hüseyin Çelebi’yi dört yüz akçeden ziyâde bin beş yüz doksan akçelik kereste dahi aldığına istihlâf etmeğin ol dahi alâ vefki’l-mes’ûl yemîn billâhi’l-aliyyi’l-azîm etmeğin mâ hüve’l-vâki‘ gıbbe’t-taleb ketb olundu. Fî evâhiri Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Cafer b. Abd[ullah], Mustafa b. Mehmed, Cafer b. Abd[ullah], Yakub b. Kurd, Mustafa b. Ahmed ve gayruhüm mine’l-hâzırîn.