Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 238 Hüküm no: 278 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın eşya davasının reddi Havâss-ı Refî‘a kazâsı müzâfâtından kasaba-i Silivri mahallâtından Alibey mahallesinde sâkin Malkaralı demekle şehîr Mehmed Beşe b. Abdullah meclis-i şer‘a nâhiye-i mezbûreye tâbi‘ Büyükhalkalı nâm karye sâkinlerinden râfi‘ü’l-kitâb diğer Mehmed b. Ali nâm kimesneyi ihzâr ve mahzarında üzerine takrîr-i da‘vâ edip târih-i kitâbdan bir sene mukaddem mahalle-i mezbûrede sâkin olduğum menzilden işbu hâzır bi’l-meclis olup mezbûr diğer Mehmed’in yedinde olan bir yemeni yorgan ve iki çarşaf ve iki sahan ve bir bakraç dahi ba‘zı eşyâm zâyi‘ olmuşidi hâlâ zikr olunan yorgan ve çarşafları ve sahanları ve bakraçı mezbûr Mehmed’in yedinde buldum suâl olunup ihkāk-ı hak olunması matlûbumdur dedikde gıbbe’s-suâl mezbûr Mehmed cevâbında, zikri sebk eden eşyâyı târih-i kitâbdan bir sene mukaddem medîne-i Hazret-i Ebî Eyyûb el-Ensârî’de Cum‘a pazarı’nda dellâl elinden semen-i ma‘lûme iştirâ eyledim mülk-i müşterâmdır, mezbûr Mehmed Beşe’nin mülkü olduğu ma‘lûmum değildir deyû cevâb vericek müdde‘î-i mezbûrdan müdde‘âsına mutâbık beyyine taleb olundukda, bi’d-defe‘ât mehl-i şer‘î ile imhâl olundukda ikāmet-i beyyineden izhâr-ı acz etmeğin eşyâ-i merkūme merkūm Mehmed yedinde ibkā olunup, mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sânî min Ramazâni’l-mübârek li sene seb‘a ve erba‘în ve elf. Şuhûdü’l-hâl: Mustafa Beşe b. Mahmud Çukadâr, Mahmud b. Ahmed, Mustafa b. Veli, Mustafa b. Mehmed, Mansur b. Mustafa, Ahmed b. Ali, Ali Beşe b. Abdullah ve gayruhüm.