Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 239 Hüküm no: 280 Orijinal metin no: [45b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Bünya’nın câriyesi Mosiye’yi azat etmesi Mahmiye-i Kostantıniyye hısnı ebvâbından Balatkapısı hâricinde Karabaş mahallesinde sâkin Yahud tâifesinden Aragon cemâ‘atinden Salamon v. Bünya nâm Yahudi meclis-i şer‘-i hatîr-i lâzımü’t-tevkīrde işbu hâzıre bi’l-meclis olan uzun boylu, açık kaşlı, sarışın elâ gözlü Rûsiyyetü’l-asl Nasrâniyyetü’l-millet râfi‘atü’l-kitâb Mosiye bt. İstaki nâm memlûke câriyesi muvâcehesinde ikrâr ve takrîr-i kelâm edip işbu evsâf-ı mezkûre ile mevsûfe olan câriyem mezbûre Mosiye’yi târih-i kitâbdan dört sene tamâmına değin emânet ve sadâkat ile hizmet etmek üzre mükâtebe eyledim ba‘de’l-yevm dört sene tamâmına değin vech-i meşrûh üzre hizmet ettikden sonra mezbûre Mosiye sâir harâir-i asliyyât gibi hürre olsun dedikde mezbûre Mosiye dahi kitâbet-i mezbûreyi kabûl ve hizmet-i lâzımeyi edâya ta‘ahhüd etmeğin mâ vaka‘a bi’t-taleb ketb olundu. Tahrîren fi’l-yevmi’s-sâlis min Ramazâni’l-mübârek li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa Beşe b. Mahmud, Ali b. Mustafa, Mustafa b. Veli, Mosi v. Yahuda, Dedehori v. David, Bünya v. Salamon, Avraham v. Mosi ve gayruhüm.