Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 240 Hüküm no: 281 Orijinal metin no: [45b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Atanaş v. Aleksi’yi yaralayıp katledenlerin yerinde soruşturulduğu Havâss-ı Refî‘a kazâsı müzâfâtından kasaba-i Çatalca sükkânından olup bundan akdem Havâss-ı merkūmeye tâbi‘ Kapadık nâm karyeye karîb yerde vâki‘ çeşme kurbunda cerh olunup, kasaba-i merkūmede mecrûhan hâlik olan Atanaş v. Aleksi nâm zimmînin cârihlerini teftîş ve tefahhus için mübâşir ta‘yîn olunan Halil Ağa yedi ile buyruldu-yı şerîf vârid olup mazmûn-ı şerîfinde cânib-i şer‘den dahi merkūm Halil Ağa ile husûs-ı mezbûra nâib irsâl oluna deyû buyurulup imtisâlen li’l-emri’l-âlî hâlik-i merkūmun cârihlerini mahall-i merkūmda tecessüs ve tefahhus için savb-ı şer‘-i kavîmden dahi mevlânâ Receb Efendi ma‘an irsâl olunup merkūm Halil Ağa ile mahall-i merkūma varıp zeyl-i kitâbda mastûrü’l-esâmî olan müslimîn mahzarlarında akd-i meclis eylediklerinde Havâss-ı merkūme tevâbi‘inden Büyükçekmece nâhiyesine tâbi‘ Dereköy demekle ma‘rûfe olan karye ahâlîsinden Abdi b. Pîr Veli ve Kuloğlu Mustafa nâm kimesneler meclis-i şer‘de takrîr-i kelâm edip târih-i kitâb-ı şehr-i Şa‘bâni’l-mu‘azzamı’nın on altıncı vâki‘ olan Cum‘a günü akşama karîb değirmenden gelir iken zikr olunan Kapadık çeşmesi’ne yakın geldiğimizde bir feryâd işittik ol hâlde mezbûr Atanaş’ı başınd[an] urup mecrûh etmişler yanımıza gelip bizden istimdâd eyledi mezbûr Atanaş bizim yanımıza gelmekle ol mahalde çukur içinden iki piyâde forsa kâfiri ve bir atlı âdem çıkıp tepe üzerine doğru firâr eylediler. Mezbûr Atanaş beni mecrûh eden bunlar idi deyip bize bu minvâl üzre cevâb verdi dediklerinde mezbûrân Abdi ve Mustafa’nın minvâl-i muharrer üzre ihbârlarını mevlânâ-yı mezbûr mahallinde ketb ve tahrîr, ba‘dehû gelip meclis-i şer‘de vukū‘u üzre ihbâr etmeğin mâ vaka‘a bi’t-taleb ketb olundu. Fi’l-yevmi’s-sâlis min Ramazâni’l-mübârek li sene seb‘a ve erba‘în ve elf. Şuhûdü’l-hâl: Ahmed b. Mehmed, Yakub b. Kurd, Mustafa b. Abdi, Cafer b. Abdullah ve gayruhüm.