Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 241 Hüküm no: 282 Orijinal metin no: [46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Himmet ile Mustafa b. Cafer’in boşandığı Medîne-i Hazret-i Ebî Eyyûb el-Ensârî mahallâtından Takyecibaşı mahallesi sâkinelerinden Fâtıma bt. Himmet nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb zevci Mustafa b. Cafer mahzarında bi tav‘ihâ ikrâr ve takrîr-i kelâm edip zevcim Mustafa Beşe ile hüsn-i zindegânemiz olmamağla, zimmetinde mütekarrir olan bin iki yüz akçe mehr-i müeccelim ve nafaka-i iddetim ve me’ûnet-i süknâm üzerine ve beynimizde ma‘lûm bir zenne münakkaş makrama ferâce üzerine hul‘ edip zikr olunan ferâceyi kendine teslîm eyledim dedikde mezbûr Mustafa beşe dahi minvâl-i meşrûh üzre mezbûre Fâtıma ile hul‘ edip zevciyyete müte‘allik cemî‘ da‘vâdan her biri âharın zimmetini ibrâ-i kātı‘ü’n-nizâ‘la ibrâ ve iskāt eylediklerinden sonra mâ vaka‘a gıbbe’t-taleb ketb olundu. Tahrîren fi’l-yevmi’r-râbi‘ min Ramazâni’l-mübârek li sene seb‘a ve erba‘în ve elf. Şuhûdü’l-hâl: Bekir b. Mehmed, Ahmed b. Demir, Hasan b. Mehmed, Mehmed b. Ahmed, Yakub b. Kurd, Mustafa b. Veli ve gayruhüm.