Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 241 Hüküm no: 283 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Sofyano’nun Hacı Yusuf b. Hasan’a olan borcunu ödediği Havâss-ı Refî‘a kazâsı müzâfâtından Küçükköy demekle ma‘rûfe olan karye sâkinlerinden Dimitri v. Sofyano nâm zimmî tarafından zikri âtî olan dükkânın binâsını bey‘a ve semenini ahz ve kabza ve semeninden işbu hâzır bi’l-meclis el-Hâc Yusuf b. Hasan nâm kimesneye zimmetinde edâsı lâzım olan on bir bin akçe deynini edâya vekîl olup hasm-ı şer‘î-i câhid mahzarında Yani v. Duka ve Duka v. Yani nâm zimmîler şehâdetleri ile şer‘an vekâleti sâbite olan Dero v. Kika nâm zimmî mahfil-i kazâda işbu râfi‘ü’l-kitâb müvekkilim mezbûr Dimitri’nin dâmâdı Yani v. Dimitri nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilim merkūm Dimitri mezbûr Yani’nin karye-i merkūmede vâki‘ bir tarafı Frenk çiftliği ve bir tarafı Dimo nâm zimmî mülkü ve bir tarafı Hristo mülkü ve bir tarafı tarîk-i âm ile mahdûd olan mülk arsası üzerinde mezbûrun ma‘rifetiyle kendi nefsiyçün binâ ve ihdâs eylediği bir bâb bakkal dükkânının binâsını vekâletim hasebiyle mezbûr Yani’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile on bir bin nakd-i râyic fi’l-vakt fıddî akçeye bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semeni olan meblağ-ı merkūm on bir bin akçeyi yedinden bi’t-tamâm ve’l-kemâl ahz ve kabz edip mezbûr el-Hâc Yusuf’a teslîm ve deynini edâ ve ibkā eyledim ba‘de’l-yevm zikr olunan dükkânın binâsı mezbûr Yani’nin mülk-i müşterâsı olmuşdur dedikde gıbbe’t-tasdîki’ş-şer‘î mezbûr el-Hâc Yusuf dahi meblağ-ı mezbûr on bir bin akçeyi vekîl-i mezbûr yedinden tamâmen alıp kabz eyledim merkūm Dimitri zimmetinde bir akçe ve bir habbe hakkım bâkī kalmadı deyû i‘tirâf etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mustafa Çelebi b. ( ), Ali Çelebi b. Hamza, Ali Beşe b. ( ), Mahmud b. Ahmed, Yorgi v. Yani, Dimo v. ( ).