Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 247 Hüküm no: 291 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahuda v. David’in menzilini Mustafa Efendi b. Ramazan’a sattığı Havâss-ı Aliyye kazâsı müzâfâtından Hasköy’de Keçeciler mahallesinde sâkin Yahuda v. David nâm Yahudi meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mustafa Efendi b. Ramazan mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Mehmed Ağa mülkü ve bir tarafdan Ganîzâde Efendi bahçesi demekle ma‘rûf olan bahçe ve iki tarafdan tarîk-i â[m] ve arz-ı hâliye ile mahdûd üç bâb fevkānî ve iki bâb tahtânî beyti ve altında ahırı ve dört bi’r-i mâyı ve eşcâr-ı müsmire ve gayr-ı müsmire hadîkayı müştemil mülk menzilimi, cümle tevâbi‘ ve levâhıkı ile mezbûr Mustafa Efendi’ye fıddî nakd-i râyic fi’l-vakt on altı bin tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve kabûl ve kabz ve tesellüm eyledikden sonra semen-i mezbûr on altı bin akçeyi mezbûr Mustafa Efendi yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan menzil-i mezbûr Mustafa Efendi’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde mukırr-ı mezbûr Yahuda’nın minvâl-i muharrer üzre cârî olan ikrârını el-mukarru lehü’l-merkūm Mustafa Efendi vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Ahmed Halîfe b. Abdi, Mahmud Çelebi es-Sarrâc, Mahmud b. Hasan, Ali b. Abdullah, Ahmed Çelebi b. Mustafa, Mehmed Bey b. Abdullah, Mahmud Bey b. Abdullah, Mustafa Efendi el-İmâm, Abdülbâkī Çelebi el-İmâm.