Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 248 Hüküm no: 293 Orijinal metin no: [47a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Yahşi’nin menzilini eşi Kerime bt. Abdullah’a sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Kasımpaşa mahallesinde sâkin Süleyman b. Yahşi nâm kimesne mahfil-i kazâda işbu hâmiletü’l-kitâb medîne-i mezbûrede Baba Haydar mahallesinde sâkine Kerime bt. Abdullah nâm hâtun tarafından ikrâr-ı âti’z-zikri tasdîka vekîl olup hasm-ı câhid mahzarında mezbûreyi ma‘rifet-i şer‘iyye ile ârifeyn olan Veli Bekir b. Ramazan ve Mustafa b. Mehmed [47b] şehâdetleri ile şer‘an vekâleti sâbite olan zevci Halil b. Mehmed mahzarında ikrâr ve i‘tirâf edip mezbûr Kasımpaşa mahallesinde vâki‘ bir tarafdan Mehpâre Hâtun vakfı olan menzil ve bir tarafdan Nakkāş Hasan vakfı olan menzil ve bir tarafdan Mansur Çorbacı mülkü ve bir tarafdan es-Seyyid Mustafa Çelebi b. es-Seyyid Zeynelâbidin mülkü ve ba‘zan âhar tarîk-i âm ile mahdûd olan iki bâb fevkānî ve üç bâb tahtânî odaları ve bahçeyi ve kenîfi ve muhavvatayı müştemil olan mülk menzilimi, cümle-i tevâbi‘ ve levâhıkı ile mezbûre Kerime Hâtun’a on altı bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr on altı bin akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûr merkūme Kerime Hâtun’un mülk-i müşterâsı olmuşdur. Keyfe mâ teşâ’ ve tahtâr mutasarrıfe olsun dedikde vekîl-i merkūm vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Alemüddin Efendi b. Süleyman el-İmâm, Şaban Halîfe b. ( ) el-Müezzin, Mustafa Çelebi b. ( ) el-Müezzin, Mustafa Çelebi b. İsmail el-Kayyım, Mehmed b. Ahmed, Murad b. Abdi, Mehmed b. Abdi, Yusuf b. Oruc, el-Hâc Hasan b. Kurd.