Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 249 Hüküm no: 294 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cennet Hatun bt. İlyas’ın menzilini Mehmed Efendi b. Yusuf’a sattığı Mahmiye-i Galata müzâfâtından kasaba-i Beşiktaş mahallâtından Paşa mahallesinde sâkine Cennet Hâtun bt. İlyas tarafından bey‘-i âti’z-zikri ikrâra vekîl olup vekâleti mezbûre Cennet Hâtun’u ma‘rifet-i şer‘iyye ile ârifeyn olan Süleyman b. Davud ve Muharrem b. İvaz şehâdetleri ile sâbite olan Mehmed b. Mustafa mahfil-i kazâda râfi‘ü hâze’l-kitâb Mehmed Efendi b. Yusuf mahzarında bi’l-vekâle ikrâr ve takrîr-i kelâm edip Havâss-ı Aliyye kazâsı müzâfâtından Çatalca nâhiyesine tâbi‘ Subaşı köyü demekle ma‘rûf karyede vâki‘ bir tarafdan ba‘zan câmi‘-i şerîf ve ba‘zan imâma mevkūf menzil ve bir tarafdan Ahmed b. Mustafa mülkü ve bir tarafdan tarîk-i âm ile mahdûd iki tahtânî çatma odayı ve bir sofayı ve bir sundurmayı ve bir ahırı ve bir âhar odasını ve bi’r-i mâyı ve zât eşcâr-ı müsmire hadîkayı müştemil olup müvekkilem mezbûre Cennet Hâtun’a bundan akdem fevt olan zevci Süleyman b. Nasuh’dan ve sadriye kızları Âişe ve Âtike’den bi hasebi’l-irsi’ş-şer‘î isâbet ve intikāl eden mülk menzilini, hâlâ mezbûr Mehmed Efendi’ye fıddî nakd-i râyic fi’l-vakt dokuz bin üç yüz akçeye bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzre iştirâ ve kabûl eyledikden sonra kabz-ı semen-i ma‘dûd edip mebî‘-i mahdûd-ı merkūmu teslîm eyledi ba‘de’l-yevm menzil-i mahdûd-ı merkūm mezbûr Mehmed Efendi’nin mülk-i müşterâsı olmuşdur dedikde vekîl-i merkūmun bi’l-vekâle cârî olan ikrârını el-mukarru lehü’l-merkūm Mehmed Efendi vicâhen tasdîk ve şifâhen tahkīk edicek mâ vaka‘a ketb olundu. Hurrire fi’l-yevmi’s-sâmin min Ramazâni’l-mübârek li sene seb‘a ve erba‘în ve elf. Şuhûdü’l-hâl: İsmail Çelebi b. ( ) el-Kadı, Hüsam Efendi b. ( ) el-Müsta‘id, Ahmed Efendi b. Mustafa el-Kâtib, Yahya Çelebi b. Ramazan b. Mustafa, Mustafa Çelebi b. Ahmed, Ahmed b. Mustafa, Mustafa b. Veli ve gayruhüm.