Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 222 Hüküm no: 216 Orijinal metin no: [28a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa b. Musli’nin Çukadar Mehmed Çelebi’ye bey‘ bi’l-istiğlâl yoluyla sattığı evini kiraladığı Mahmiye-i İstanbul’da Hüsrev Paşa türbesi kurbunda Kazasker Mehmed Efendi mahallesi sâkinlerinden olup dergâh-ı âlî -dâme merci‘an li’l-e‘âlî- yeniçerilerinin onuncu ağa bölüğü yoldaşlarına mahsûs odanın çavuşu olan Osman Ağa b. Musli tarafından husûs-ı âti’l-beyâna vekîl olduğu Ömer Efendi b. İsmail ve Mehmed Çelebi b. Abdurrahman nâm kimesneler şehâdetleriyle şer‘an sâbit olan korucu Hasan Beşe b. Abdullah nâm kimesne meclis-i şer‘-i şerîf-i lâzımü’t-teşrîfde zikr olunan onuncu ağa bölüğü yoldaşlarının mühimmâtlarına mevkūfe nukūdun bi’l-fi‘l mütevellîsi olan çukadâr Mehmed Çelebi b. İsa nâm kimesne mahzarında ikrâr ve takrîr-i kelâm edip müvekkilim merkūm Osman Ağa mahalle-i mezbûrede vâki‘ bir tarafdan bakkal Hasan mülkü ve bir tarafdan merhûm Haydar Ağazâde kızının kızı Fâtıma Hâtun bt. Ali Ağa mülkü ve bir tarafdan Medîne-i Münevvere vakfı’ndan Bakkal Ali Beşe tasarrufunda olan menzil ile mahalle-i mezbûre müezzinine meşrût vakf menzil ve bir tarafdan tarîk-i âm ile mahdûd dâhiliyyesinde fevkānî bir oda ve bir sofa ve bir tahta-pûşu ve tahtânî bir oda ve bir matbah ve mezbûr Bakkal Ali Beşe ile müşterek bir su kuyusu ve bir kenîf ve hâriciyyesinde fevkānî bir oda ve tahtânî bir oda ve bir ahır ve bir kenîfi müştemil mülk menzilini bi tarîki’l-istiğlâl mütevellî-i merkūm çukadâr Mehmed Çelebi’ye iki yüz kıt‘a esedî guruşa bey‘ ve teslîm ol dahi yedinde olan mâl-ı vakf-ı mezbûr ile iştirâ ve tesellüm eyledikden sonra semeni olan meblağ-ı mezkûr iki yüz kıt‘a esedî guruşu tamâmen yedinden ahz u kabz eylediğinden sonra mütevellî-i mezkûr menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin yirmi dört kıt‘a esedî guruşa müvekkilim mezbûr Osman Ağa’ya îcâr ve teslîm edip ol dahi istîcâr [28b] ve kabz ve tesellüm eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti Cumâdelâhire li sene 1077. Şuhûdü’l-hâl: Mustafa Ağa b. İsmail Ağa, Osman Beşe b. Receb Ser-oda, Mahmud Efendi b. Rüstem, Mehmed Çelebi b. Ali.