Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 299 Hüküm no: 371 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Ali’nin menzil, bağ, bostan ve tarlalarını Hasan Bey b. Abdullah’a bağışlaması Mahmiye-i İstanbul’da Langa semtinde vâki‘ Cellad çeşmesi kurbunda sâkin fahrü’l-emâcid ve’l-a‘yân Mehmed Ağa b. Ali tarafından husûs-ı âti’z-zikri ikrâra vekîl olup hasm-ı câhid mahzarında Ali Bey b. İbrahim ve İsa Bey b. Abdullah şehâdetleri ile şer‘an vekâleti sâbite olan İsa Efendi b. Hamza mahfil-i kazâda işbu râfi‘ü’l-kitâb Hasan Bey b. Abdullah nâm kimesne mahzarında bi’l-vekâle ikrâr-ı tâm ve takrîr-i kelâm edip müvekkil-i mezbûr Mehmed Ağa Havâss-ı Refî‘a kazâsı müzâfâtından Büyükçekmece nâhiyesine tâbi‘ Boserdar nâm karyede vâki‘ iki tarafı Yani v. Dimitri mülkü ve iki tarafı tarîk-i âm ile mahdûd iki bâb odaları ve bir anbarı ve sundurmayı ve fırını ve bir ahırı ve muhavvata-i zât eşcâr-ı müsmire ve gayr-ı müsmireyi müştemil çiftlik ta‘bîr olunur mülk menzilini ve karye-i mezbûre kurbunda vâki‘ bir tarafı Somuncu bağları ve bir tarafı Mustafa b. Abdullah mülkü ve bir tarafı İstabo v. Nikola mülkü ve bir tarafı vâdi ile mahdûd olup beher sene merhûm ve mağfûrun-leh Sultan Bayezid-i Velî Hân -tâbe serâhû- evkāfına yirmi akçe mukāta‘ası olan bir kıt‘a mülk bağını mezbûr Hasan Bey’e mevâni‘-i rücû‘dan âriye hibe-i sahîha-i şer‘iyye ile hibe ve teslîm edip ol dahi meclis-i hibede ittihâb ve kabûl ve kabz ve tesellüm eyledikden sonra yine merhûm-ı mezbûr Sultan Bayezid-i Velî evkāfı arâzisinden olup vakf-ı mezbûra beher sene yirmi akçe mukāta‘ası olan bir tarafı Ahmed b. Memi çayırı ve bir tarafı Pono v. Kiro çayırı ve bir tarafı Aleksi v. Merten ve bir tarafı Kiti v. Todori çayırı ile mahdûd üç hisseden iki hisse çayırının ve yine vakf-ı mezbûra beher sene yirmi akçe mukāta‘ası olan ma‘lûmü’l-hudûd bir kıt‘a bostanın ve yine evkāf-ı mezbûra arâzisinden olup müvekkil-i mezbûrun taht-ı tasarrufunda olan bir tarafı tarîk-i âm ve bir tarafı ba‘zan Ahmed b. Memi tarlası ve ba‘zan Cafer b. Mustafa tarlası ve bir tarafı Sekban Çelebi tarlası ve bir tarafı Borno v. Kiro tarlası ile mahdûd tahmînen dokuz keyl tohum istî‘âb eder bir kıt‘a ve yine iki tarafdan Pavlo v. Marko tarlası ve bir tarafı Aleksi v. Marko tarlası ile ve bir tarafı bâlâda zikr olunan çayır ile mahdûd bir keyl tohum istî‘âb eder bir kıt‘a tarla, yine bir tarafdan Aleksi v. Marko tarlası ve bir tarafdan ba‘zan Dimitri v. Donat, ba‘zan Pavlo v. Marko tarlaları ve bir tarafı İstemad v. Dimitri tarlası ve bir tarafı tarîk-i âm [60a] ile mahdûd on beş keyl tohum istî‘âb eder bir kıt‘a ve yine bir tarafı Musa Beşe b. İvaz tarlası ve bir tarafı Mehmed b. İshak tarlası ve bir tarafı Pavlo v. İlya tarlası ve bir tarafı Nikola v. Dimitri tarlası ile mahdûd dört keyl tohum istî‘âb eder bir kıt‘a ve yine etrâf-ı erba‘ası Mustafa b. Abdullah tarlasıyla mahdûd on altı keyl tohum istî‘âb eder bir kıt‘a ve yine bir tarafdan ba‘zan Nihad Ağa ve ba‘zan Ferruh Ağa tarlaları ve bir tarafdan Mustafa b. Abdullah tarlası ve bir tarafdan Marko v. Mitro tarlası ve bir tarafdan Toma v. Dimitri tarlası ile mahdûd tahmînen iki keyl tohum istî‘âb eder bir kıt‘a ve yine bir tarafdan Hasan Çelebi b. Mustafa ve iki tarafdan vâdi ve bir tarafdan tarîk-i âm ile mahdûd ve tahmînen üç keyl tohum istî‘âb eder bir kıt‘a ve yine bir tarafdan Ahmed b. Memi tarlası ve iki tarafdan vâdi ve bir tarafdan tarîk-i âm ile mahdûd tahmînen iki keyl tohum istî‘âb eder bir kıt‘a ve yine bir tarafdan Mahmud b. Karagöz tarlası ve bir tarafdan Kiti v. Todori tarlası ve bir tarafdan Yani v. Dimitri tarlası ve bir tarafdan tarîk-i âm ile mahdûd bir kıt‘a ve yine evkāf-ı mezbûre arâzisinden olup mevâzi‘-i müteferrikada vâki‘ her biri inde’l-cîrân ma‘lûmü’l-hudûd olan on kıt‘a tarlalar ki cem‘an yirmi kıt‘a tarlalarının dahi hakk-ı tasarrufunu evkāf-ı mezbûre mütevellîsi ma‘rifetiyle mezbûr Hasan Bey’e tefvîz edip ol dahi tefevvuz ve kabûl eyledikden sonra mezâri‘-i merkūmeyi ve zikr olunan çayır ve bostanı kendiye teslîm eyledi müvekkil-i mezbûrun menzil-i merkūmda ve bağda ve mezâri‘-i merkūme ve çayır ve bostanda min ba‘d alâka ve medhali kalmayıp menzil-i mezbûr mülk-i mevhûbu ve mezâri‘-i merkūme ve çayır ve bostan dâhil-i taht-ı tasarrufu olmuşdur dedikde vekîl-i mezbûrun minvâl-i muharrer üzre cârî ve sâdır olan ikrâr ve takrîri el-mukarru lehü’l-merkūm Hasan Bey vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Fahrü’l-ekâbir ve’l-a‘yân Mustafa Ağa birâder-i merhûm Murtaza Paşa, fahrü’l-küttâb Ali Efendi, es-Seyyid Selâmi Çelebi b. ( ), Handan Ağa b. Abdullah, Mustafa b. Murad, Murad b. Abdullah el-Hâc, Osman b. Abdullah, Ahmed Beşe b. İbrahim, Yusuf b. Abdullah.