Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 300 Hüküm no: 372 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın varislerinin miras menzili paylaştıkları Medîne-i Hazret-i Ebî Eyyûb el-Ensârî mahallâtından Kara Süleyman Çelebi mahallesi sâkinelerinden iken bundan akdem vefât eden Âişe bt. Mustafa nâm hâtunun verâseti zevc-i metrûkü Ömer b. Musa nâm kimesneye ve li ebeveyn ammi kızı Kerime bt. Ali nâm Hâtun’a münhasıra olduğu şer‘an mütehakkik oldukdan sonra mezbûr Ömer asâleten ve mezbûre Kerime Hâtun tarafından husûs-ı âti’z-zikre vekîl olup vekâleti Mahmud Hoca b. Ali ve Mahmud Halîfe b. Mehmed nâm kimesne şehâdetleri ile sâbite olan zevci Ali Beşe b. Ramazan vekâleten mahfil-i kazâda her biri takrîr-i kelâm edip müteveffât-ı mezbûrenin metrûkâtından olup mahalle-i mezbûrede vâki‘ bir tarafdan Mahmud Hoca b. Ali mülkü ve bir tarafdan Sipâhi oğlu Mehmed nâm kimesne mülkü ve iki tarafdan tarîk-i hâs ile mahdûd iki bâb tahtânî beyti ve sofayı ve bir fevkānî beyti ve sofayı ve bi’r-i mâyı ve bahçeyi müştemil mülk menzilin bi hasebi’l-irsi’ş-şer‘î nısfı zevcine ve nısf-ı âharı mezbûre Kerime’ye intikāl etmekle tarafeynin rızâsıyla menzil-i mezbûr tansîf olunup mezkûr Mahmud Hoca tarafından olan bir bâb tahtânî ve bir bâb fevkānî beyti ve sofayı ve hadîkayı müştemil olan hisse mezbûre Kerime Hâtun’a ve Sipâhi oğlu Mehmed tarafında olan bir bâb tahtânî beyti ve sofayı ve hadîkayı ve bi’r-i mâyı müştemil olan hisse mezbûr Ömer’e ta‘yîn olunup zikr olunan bi’r-i mâ ikisi mâbeyninde müşterek olmak üzre tarîk-i hâs tarafında vâki‘ dut ağacından mukābelesinde vâki‘ dut ağacına varınca hatt-ı müstakīm farz olunup dut ağaçları mezbûr Ömer hissesine kalmak üzre beynimizde taksîm ve terâzi eylemişdir dediklerinde her biri âharın kelâmını vechen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Veli b. Abdi, Mahmud b. Ahmed, Mehmed b. Ahmed, Süleyman b. Veli, Ali b. Veli, İsa b. Veli, Hasan Hoca b. ( ), İbrahim b. Durmuş.