Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 302 Hüküm no: 374 Orijinal metin no: [60b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Paroş v. Rizo ve kardeşi İskarlet’in değirmen ve çayırlardaki hisselerini Apostol ve Paroş’a sattıkları Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Şirvek nâm karye zimmîlerinden Paroş v. Rizo nâm zimmî kendi cânibinden asâleten ve li ebeveyn er karındaşı İskarlet nâm zimmî tarafından dahi husûs-ı âti’z-zikri ikrâra vekîl olup hasm-ı câhid mahzarında Dimo v. Anderon ve Yorgi v. İskarlet nâm zimmîler şehâdetleri ile vekâleti sâbite oldukdan sonra vekâleten mahfil-i kazâda ikrâr-ı âti’z-zikri tasdîka kendi cânibinden asıl ve li ebeveyn er karındaşı diğer Paroş v. Rizo tarafından vekîl olup hasm-ı câhid mahzarında nehc-i şer‘î üzre vekâleti sâbite olan bâ‘isü hâze’l-kitâb Apostol nâm zimmî mahzarında asâleten ve vekâleten ikrâr-ı tâm ve takrîr-i kelâm edip karye-i merkūme kurbunda vâki‘ fevki Taşköprü demekle ma‘rûf olan cisr ve tahtı Nikola ve Papas nâm zimmîler değirmeni ile mahdûd olup mukarrer binâ ve Dokuzçeşme suyu demekle ma‘rûf nehir üzerinde dâyir müşteriyân-ı mezbûrân ile ale’s-seviy müşterek olduğumuz bir göz değirmenden bizim mülkümüz olan nısf hisse-i şâyi‘amızı, mezbûr Apostol ve Paroş’a üç bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip onlar dahi ale’l-iştirâki’s-seviy iştirâ ve kabûl eylediklerinden sonra yine karye-i mezbûre arâzisinde vâki‘ lede’l-ahâlî ma‘lûmü’l-hudûd olup iki kıt‘ası Kurna nâm mevzi‘de ve iki kıt‘ası karye-i mezbûre kurbunda ve bir kıt‘ası dahi altın nâm mevzi‘de olan cem‘an beş kıt‘a çayırlarımızın dahi hakk-ı tasarrufunu mezbûrân Apostol ve Paroş’a on iki bin mezbûrü’n-na‘t akçe bedel mukābelesinde sâhib-i arz ma‘rifetiyle tefvîz edip onlar dahi vech-i muharrer üzre iştirâken tefevvuz ve kabûl eylediklerinde bedel-i mezbûr on iki bin akçe ile semen-i mezbûr üç bin akçe ki cem‘an on beş bin akçe mezbûrân Apostol ve Paroş yedlerinden bi’t-tamâm ve’l-kemâl ahz ve kabz edip mârrü’z-zikr değirmeni mahallinde kabz ve tesellüme ve mezâri‘-i mezbûreyi zabt ve tasarrufa yine mezbûrân Apostol ve Paroş’u taslît eyledik dedikde mukırr-ı mezbûr Paroş’un bi’l-asâle ve bi’l-vekâle cârî ve sâdır olan ikrâr ve takrîr birle el-mukarru lehü’l-merkūm asâleten ve vekâleten bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Yakub b. Kurd, Ali b. Mustafa, Mustafa b. Veli, Ali b. Abdullah, Cafer b. Abdullah, Armağan v. Todori, Yorgi v. Mihal, Yorgi v. Kosta, İstani v. Simo, Lambo v. Dimitri ve gayruhüm.