Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 303 Hüküm no: 375 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Polizo v. Yani’nin mumhanenin yarı hissesi ile bazı alet ve edevatını Aleksandri v. Paroş’a sattığı Mumcu tâifesinden Polizo v. Yani nâm zimmî mahfil-i kazâda işbu hâmilü’l-kitâb Aleksandri v. Paroş nâm zimmî muvâcehesinde ikrâr-ı tâm ve takrîr-i kelâm edip merhûm Davud Ağa nâm sâhibü’l-hayrın evkāfından olup mahmiye-i Galata dâhilinde vâki‘ bir tarafı vakf-ı mezbûrdan olup İbrahim Ağa tasarrufunda olan şem‘hâne ve bir tarafı Tanaş v. İskarlet nâm zimmî mutasarrıf olduğu şem‘hâne ve bir tarafı sâhil-i bahr ve bir tarafı tarîk-i âm ile mahdûd olup gāib ani’l-meclis olan Anderon v. Todori nâm zimmî ile ale’l-iştirâki’s-seviy mutasarrıf olduğum şem‘hâneden icâre-i mu‘accele ve her ay kırk beş akçe icâre-i müeccele ile mutasarrıf olduğum nısf şem‘hânenin hakk-ı tasarrufunu, evkāf-ı mezbûre mütevellîsi ma‘rifetiyle mezbûr Aleksandri’ye sekiz bin nakd-i râyic fi’l-vakt fıddî akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra zikr olunan şem‘hânede vâki‘ yine mezbûr Anderon ile ber vech-i iştirâk mülkümüz olan bir büyük kazgan ve bir küp ve bir mengene ve beynimizde ma‘lûm sâir şem‘hâne âlâtından olan nısf hisse-i şâyi‘amı dahi mezbûr Aleksandri’ye yirmi bin mezbûrü’n-na‘t akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile kabz ve teslîm edip ol dahi vech-i meşrûh üzre iştirâ ve tesellüm eyledikden sonra meblağ-ı mezbûr yirmi bin akçe ile mukābele-i tefvîzde olan sekiz bin akçe ki cem‘an yirmi sekiz bin akçe eder mezbûr Aleksandri yedinden bi’t-tamâm ve’l-kemâl ahz ve kabz eyledim eşyâ-i mezbûre merkūm Aleksandri’nin mülk-i müşterâsı ve zikr olunan şem‘hânenin nısfı minvâl-i muharrer üzre dâhil-i taht-ı tasarrufu olmuşdur dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.