Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 329 Hüküm no: 412 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bostancı Mustafa’nın Alibeyköy bahçesine vakfettiği hayvanların yeni zabitlerine teslim edildiği Hadâik-i sultâniyyeden Alibeyköyü demekle ma‘rûfe karyede vâki‘ hadîkada bostancı ve hadîka-i merkūmede sâkin olanlara mukaddemâ Mustafa nâm bostancı vakf eylediği üç aded kara sığır inekleri ve iki kara sığır düveleri ve iki kara sığır danalarının zâbitleri olup hâlâ kapuya çıkmağla dergâh-ı âlî yeniçerilerinden olan Mahmud Beşe ve Musa Beşe nâm râcil mahfil-i kazâda zikr olunan bahçede hoca olan Osman Efendi ve bostancılar bölükbaşısı olan Receb Beşe b. Abdullah mahzarlarında her biri ikrâr-ı tâm ve takrîr-i kelâm edip hâlâ biz yeniçeri olup hadîka-i mezbûreden çıkmağla zabtımızda olan üç aded ineği ve iki düveyi ve iki danayı mezbûrân Osman Efendi ve Receb Beşe’ye teslîm eyledik dediklerinde mezbûrân Mahmud Beşe ve Musa Beşe’nin minvâl-i meşrûh üzre cârî olan ikrârlarını bi’l-muvâcehe tasdîk ve zikr olunan üç inek ve iki düve ve iki danayı kabz ve tesellüm eylediğini bi’l-muvâcehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Kara Mehmed b. ( ), İbrahim b. ( ), Abbas Efendi, Yakub b. Kurd, Receb Efendi b. Abdi, Mahmud b. Ahmed, Ali b. Abdullah.