Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 329 Hüküm no: 413 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsteryo v. Todori’nin Kiro v. Niko’daki olan alacağının varislerinden tahsil edilmesi Mahmiye-i Kostantıniyye hısnı ebvâbından Ebî Eyyûb el-Ensârî kapısı dâhilinde Mustafa Paşa-yı Atîk mahallesinde sâkin İsteryo v. Todori nâm zimmî, mahfil-i kazâya Havâss-ı Aliyye müzâfâtından Küçükköyü demekle ma‘rûfe karyede sâkin iken bundan akdem hâlik olan Kiro v. Niko nâm zimmînin sulbî sagīr oğlu Hristo nâm sagīrin tesviye-i umûruna kıbel-i şer‘den mansûb vasîsi olan Yorgi v. Yani nâm zimmîyi ihzâr ve mahzarında üzerine takrîr-i da‘vâ edip târih-i kitâbdan üç sene mukaddem hâlik-i mezbûr Kiro’ya alâ tarîki’l-karzi’ş-şer‘î altı bin akçe vermiş idim kable’l-edâ hâlik olup zimmetinde kalmışdır suâl olunup metrûkâtından alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûr İsteryo’dan müdde‘âsına mutâbık beyyine taleb olundukda, karye-i mezbûre sâkinlerinden Duka v. Manol ve Dido v. Kika nâm zimmîler li ecli’ş-şehâde meclis-i şer‘a hâzırân olup istişhâd olunduklarında her biri edâ-i şehâdet-i şer‘iyye edip hâlik-i mezbûr Kiro hâl-i hayâtında bizim huzûrumuzda müdde‘î-i mezbûr İsteryo’ya karz-ı şer‘îden zimmetimde edâsı lâzım altı bin akçe deynim vardır deyû ikrâr eyledi bu husûsa şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı mezbûr altı bin akçeyi hâlik-i mezbûrdan hâl-i hayâtında küllen ve ba‘zan istîfâ etmediğine mezkûr İsteryo’ya yemîn teklîf olundukda, alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin meblağ-ı mezbûr altı bin akçeyi hâlik-i mezbûr Kiro’nun metrûkâtından mezbûr İsteryo’ya edâ etmeye vasiyy-i mezbûr Yorgi’ye tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Yakub b. Kurd, Ali b. Abdullah, Kiko v. Dimo, İlyaki v. Moço, Andriye v. Fondi, İstati v. Mihal.