Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 330 Hüküm no: 414 Orijinal metin no: [67a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Yorgi’nin Hırsafi v. Yani’ye borçlu olduğunu kabul ettiği Kasab tâifesinden Andriye v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Hırsafi v. Yani nâm kasab zimmî muvâcehesinde bi’t-tav‘i’s-sâf ikrâr ve i‘tirâf edip ben mezbûr Hırsafi’nin kanâdârı olup kasab dükkânında nâsa bey‘ eylediğim lahm bahâsından ba‘de külli hesâb zimmetimde mezbûr Hırsafi’ye on üç bin üç yüz otuz akçe deynim zuhûr edip hâlâ meblağ-ı mezbûr on üç bin üç yüz otuz akçe mezbûr Hırsafi’ye zimmetimde vâcibü’l-edâ ve lâzımü’l-kazâ deynimdir dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mehmed Beşe b. Abdullah, Dilâver Ağa b. Abdullah, Yusuf Çelebi b. Mustafa, Uzun Mehmed b. Abdullah, Mahmud b. Ahmed, Hato v. Petro.