Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 330 Hüküm no: 415 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın varisinin ve muhallefatı elinde bulunduranın sulh olduğu Medîne-i Hazret-i Ebî Eyyûb el-Ensârî mahallâtından Veli Baba mahallesinde sâkine iken bundan akdem müteveffât olan Âişe bt. Mus[ta]fa’nın li ebeveyn ammi oğlu ve alâ vechi’l-inhisâr vârisi olan Mustafa nâm kimesne mahfil-i kazâda müteveffât-ı mezbûrenin terekesine vâzı‘ü’l-yed olan işbu hâmilü’l-kitâb İbrahim Beşe b. Sefer mahzarında bi’t-tav‘ ikrâr ve i‘tirâf edip müteveffât-ı mezbûre Âişe merkūm [İbrahim] Beşe’nin menzilinde vefât etmekle cümle muhallefâtı mezbûr İbrahim Beşe yedinde kalıp verâsetim hasebiyle hâlâ taleb-i da‘vâ eylediğimde beynimizde münâza‘ât-ı kesîre ve muhâsamât-ı adîde vâkı‘a olmuşidi el-hâletü hâzihî es-sulhu seyyidü’l-ahkâm muktezâsınca muslihûn tavassut edip husûs-ı mezbûrdan beni dört yüz akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr dört yüz akçeyi bi’t-tamâm ve’l-kemâl mezbûr İbrahim Beşe yedinden ahz ve kabz edip husûs-ı mezbûra müte‘allik da‘vâdan mezbûr İbrahim Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm husûs-ı mezbûra müte‘allik benden bi’z-zât ve bi’l-vâsıta da‘vâ ve nizâ‘ sudûr ve zuhûr ederse inde’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud Efendi b. Mehmed el-İmâm, Mehmed Halîfe b. Musa el-Müezzin, Hüseyin Çelebi b. Mehmed er-Râcil, Yakub b. Kurd, Mahmud b. Ahmed, Mustafa b. Veli Ali b. Abdullah.