Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 331 Hüküm no: 416 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Kiro’nun miras menzil ve bağdaki hissesini İsteryo v. Todori’ye sattığı Havâss-ı Aliyye kazâsı müzâfâtından Küçükköy demekle ma‘rûfe karyede sâkin iken bundan akdem hâlik olan Kiro v. Niko nâm zimmînin sagīr oğlu Hristo’nun tesviye-i umûruna kıbel-i şer‘den mansûb vasîsi olan Yorgi v. Yani nâm zimmî mahfil-i kazâda işbu hâmilü’s-sifr İsteryo v. Todori nâm zimmî muvâcehesinde bi’l-vesâye ikrâr ve takrîr-i kelâm edip hâlik-i mezbûrun terekesinden karye-i mezbûrede vâki‘ bir tarafdan sagīr-i mezbûr mülkü ve bir tarafdan Yorgi nâm zimmî mülkü ve bir tarafdan Dido v. Kika ve bir tarafdan tarîk-i âm ile mahdûd bir bâb fevkānî odayı ve altında mahzeni müştemil menzilini ve karye-i mezbûr sınırında vâki‘ bir tarafdan Kiryaki bağı ve bir tarafdan Yani v. Duka bağı ve bir tarafdan ve iki tarafdan tarîk-i âm ile mahdûd bir kıt‘a bağın humsunu ifrâz edip alâmât-ı fâsıla vaz‘ eylediğimizden sonra hâlik-i mezbûrun zarûret-i deyni için bey‘ olunmak lâzım gelmeğin sûk-ı sultânîde nidâ ve müzâyede olunup rağabât-ı nâs bi’l-külliye münkatı‘ oldukdan sonra mezbûr İsteryo üzerinde altı bin akçede karâr edip ziyâde ile tâlib-i âhar olmamağın menzil-i mezbûr ile zikr olunan bağın hums-ı müfrezini vesâyet-i mahkiyem hasebiyle mezbûr İsteryo’ya fıddî râyic fi’l-vakt altı bin akçeye bey‘-i bâtt-ı sahîh-i şer‘î ve safka-i vâhide ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr altı bin akçeyi hâlik-i mezbûr Kiro’nun terekesinden mezbûr İsteryo’ya şer‘an edâsı lâzım olan altı bin akçe deynine takās eyledim ba‘de’l-yevm zikr olunan menzil ve bağın hums-ı müfrez-i mu‘ayyeni mezbûr İsteryo’nun mülk-i müşterâsı olmuşdur dedikde vasiyy-i mezbûr Yorgi’nin minvâl-i meşrûh üzre cârî olan ikrârını el-mukarru lehü’l-merkūm İsteryo vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Receb Efendi b. Abdi, Mahmud b. Ahmed, Yakub b. Kurd, Mustafa b. Veli, Kiko v. Dimitri, İlyaki v. Moço, Andriye v. Kondi, İstati v. Mihal.