Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 332 Hüküm no: 417 Orijinal metin no: [67b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çavuş b. Yusuf’un çocuklarının miras çiftlik ve bağı Beşir Bey b. Mehmed’e sattıkları Mahmiye-i Kostantıniyye’de Avratpazarı kurbunda Kiçi Hâtun mahallesinde sâkin iken bundan akdem müteveffâ olan İbrahim Çavuş b. Yusuf’un verâseti sulbî kebîr oğulları Mehmed Efendi ve Nuh Çelebi’ye ve sulbiye kebîre kızları İsmihan ve Hatice’ye münhasıra olduğu şer‘an mütebeyyin oldukdan sonra mezbûr Mehmed Efendi kendi tarafından asâleten ve mezbûre İsmihan tarafından bey‘-i âti’z-zikri ikrâra vekîl olup hasm-ı câhid mahzarında mezbûre İsmihan’ı ma‘rifet-i şer‘iyye ile ârifeyn olan el-Hâc İvaz b. Hızır ve Halil Beşe b. Yusuf şehâdetleri ile şer‘an vekâleti sâbite oldukdan sonra vekâleten ve mezbûr Nuh Çelebi kendi tarafından asâleten ve mezbûr Hatice tarafından bey‘-i câ’i’z-zikri ikrâra vekîl olup hasm-ı câhid mahzarında şâhidân-ı mezbûrân şehâdetleri ile vekâleti sâbite oldukdan sonra vekâleten mahfil-i kazâda işbu hâmilü’l-kitâb Beşir Bey b. Mehmed mahzarında her biri asâleten ve vekâleten ikrâr ve takrîr-i kelâm edip Havâss-ı Aliyye kazâsı müzâfâtından Terkos nâhiyesine tâbi‘ Hacı Mihaliç nâm karyede vâki‘ cevânib-i erba‘ası Mahmud Ağa ve Mehmed Bey mülkleri ve tarîk-i âm ile mahdûd olup çiftlik ta‘bîr olunur bir bâb tahtânî ve bir bâb fevkānî odaları ve bir ahırı ve iki anbarı ve taş duvarlı havluyu ve eşcâr-ı müsmire ve gayr-ı müsmire-i mütenevvi‘ayı müştemil olan mülk menzilimizi, cümle tevâbi‘ ve levâhıkı ile ve hudûd-ı mezbûr dâhilinde vâki‘ bir kıt‘a mülk bağımızı ve çiftlik-i mezbûrda mevcûd olan iki çift kara sığır öküzlerini ve üç buzağılı kara sığır [68a] ineğini ve iki danayı ve iki arabayı ve on kaz ve yirmi tavuğu ve bir sahan ve bir bakraç ve bir kaliçeyi mezbûr Beşir Bey’e fıddî nakd-i râyic fi’l-vakt yirmi bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ ve teslîm eyledikden sonra semen-i mezbûr yirmi bin akçeyi bi’t-tamâm ve’l-kemâl mezbûr Beşir Bey’in yedinden ahz ve kabz eyledik. Ba‘de’l-yevm zikr olunan menzil ve bağ ve eşyâ-i merkūme müşterî-i mezbûr Beşir Bey’in mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dediklerinde mukırrân-ı mezbûrân Mehmed Efendi ve Nuh Çelebi’nin bi’l-asâle ve bi’l-vekâle cârî olan ikrârlarını mezbûr Beşir Bey vicâhen tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mehmed Efendi b. Pîrî, Halil b. Yusuf, Osman b. Mustafa, el-Hâc İvaz b. Hızır, Hüseyin Beşe b. Abdullah, Mehmed b. İbrahim. Mustafa Beşe b. Ali, Bayram Beşe er-Râcil, Mehmed Ağa b. Hüseyin.