Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 335 Hüküm no: 420 Orijinal metin no: [68b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Beşe b. Mehmed’in yarı menzilini Yani v. Tomyoni’ye sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Nişancı mahallesinde sâkin Osman Beşe b. Abdullah [Mehmed] mahfil-i kazâda râfi‘ü’l-kitâb Yani v. Tomyoni nâm zimmî muvâcehesinde bi’t-tav‘ihî ikrâr ve i‘tirâf edip mahalle-i mezbûrede vâki‘ bir tarafdan Rıdvan b. Mehmed mülkü ve bir tarafdan vakıf menzil ve iki tarafdan tarîk-i âm ile mahdûd iki bâb tahtânî beyti ve bir kileri ve muttasıl bir bâb dükkânını müştemil olan mülk menzilin mezkûr Rıdvan tarafında vâki‘ bir bâb tahtânî odayı hâvî nısf-ı müfrez-i mu‘ayyenini mezbûr Yani’ye fıddî nakd-i râyic fi’l-vakt altı bin akçeye bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm eyledikden sonra meblağ-ı mezbûr altı bin akçeyi bi tamâmihî yedinden ahz ve kabz eyledim ba‘de’l-yevm zikr olunan nısf menzil mezbûr Yani’nin müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Abdurrahman Efendi b. eş-Şeyh Musa el-İmâm, Ramazan Çelebi b. Hüseyin el-Müezzin, Ahmed b. Ali, Hüseyin b. Mehmed, Mahmud b. Ahmed el-Muhzır, Mustafa b. Şükür, Ahmed b. İdris ve gayruhüm.