Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 335 Hüküm no: 421 Orijinal metin no: [68b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Abdülkâdir Efendi b. Şeyh Ali’nin menzilini istiğlâl yoluyla Halime bt. Abdülfettah Efendi’ye sattığı Mahmiye-i Kostantıniyye mahallâtından Odabaşı çarşısı kurbunda vâki‘ Uzun Yusuf mahallesinde sâkin olan fahrü’l-kuzât Kadı Abdülkādir Efendi b. Şeyh Ali nâm kimesne meclis-i şer‘-i şerîfde hâzır olup âtiyyü’z-zikr menzilini Halime bt. Abdülfettâh Efendi nâm sagīrenin vasîsi hâmil-i hâze’l-kitâb Mehmed Efendi b. Ramazan’a bey‘ ettiğini ikrâr ve i‘tirâf etti. Vasiyy-i mezbûr da sagīre-i merkūme malıyla ve istiğlâl maksadıyla, mezbûr Abdülkādir Efendi’nin işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede kâin bir tarafdan Âişe Hâtun mülkü, diğer tarafdan tabbâh Ahmed mülkü, öteki tarafdan Keyvan b. Abdullah mülkü ve diğer tarafdan mescid-i mahalle müezzinine vakf edilmiş menzil ile mahdûd cemî‘-i menzili cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt iki yüz seksen sekiz riyâlî guruşa, bir guruş yüz yirmi beş akçe hesâbı olmak üzre cem‘an otuz altı bin akçeye iştirâ etti. Bâyi‘-i mezbûrun menzili kirâlamak istemesi üzerine vasiyy-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına on altı bin iki yüz akçe ücret ile menzili kirâya verdi. Vasiyy-i mezbûr, vâki‘ ikrârı vicâhen ve şifâhen tasdîk etti. Sonra Kadı Seyyid Ömer Efendi b. Seyyid Osman, Altıpoğaça câmi‘i hatîbi Osman Efendi b. Osman ve mahalle-i mezbûre sükkânından Mehmed Çelebi b. Yusuf nâm kimesneler menzil-i mezbûrun derkine ve ücret-i merkūmeye, îcâb ve kabûlü hâvî kefâletle kefîl oldular. Cerâ zâlike ve hurrire fi’l-yevmi’s-sâdis ve’l-ışrîn min Şevvâli’l-mükerrem sene seb‘a ve erba‘în ve elf. Şuhûdü’l-hâl: Şeyh Mehmed Efendi b. Pîrî, İmâm İshak Çelebi b. Veli, müezzin Murtaza Halîfe b. Mehmed, Müderris Abdülbâkī Çelebi, Kenan b. Abdullah, Oruc b. Şaban, Yusuf b. Abdullah, kâtib Hüseyin Çelebi b. Abdi, Ahmed Çelebi