Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 338 Hüküm no: 425 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Abdullah’tan miras ahırın borçlarına karşılık satılması Medîne-i Hazret-i Ebî Eyyûb el-Ensârî mahallâtından Süleyman Subaşı mahallesinde sâkin iken müteveffâ olan Yusuf b. Abdullah’ın verâseti zevce-i metrûkesi Âişe bt. Keyvan nâm hâtuna ve sulbî oğlu Mehmed ve sulbiye sagīre kızı Fâtıma’ya münhasıra olduğu şer‘an mütebeyyin oldukdan sonra mezbûr Mehmed kendi tarafından asâleten ve sagīre-i mezbûrenin tesviye-i umûruna kıbel-i şer‘den vasî nasb olundukdan sonra vesâyeten ve mezbûre Âişe dahi asâleten mahfil-i kazâda işbu râfi‘ü’l-kitâb es-Seyyid İbrahim b. Halil ve Murad Beşe b. Abdullah mahzarlarında her biri asâleten ve vesâyeten ikrâr ve i‘tirâf edip mahalle-i mezbûrede vâki‘ iki tarafdan kendi mülklerimiz ve bir tarafdan kâtib Mehmed Çelebi mülkü ve bir tarafdan tarîk-i âm ile mahdûd olup müteveffâ-yı mezbûrdan irs-i şer‘î ile bize intikāl eden bir bâb ahır müteveffâ-yı mezbûrun zarûret-i düyûn-ı müsbetesi ve sagīre-i mezbûrenin zarûret-i nafakası için bey‘ olunmak lâzım gelmeğin sûk-ı sultânî’de kirâren ve mirâren nidâ ve müzâyede olundukda, rağabât-ı nâs bi’l-külliye münkatı‘ oldukdan sonra mezbûrân es-Seyyid İbrahim ve Murad Beşe üzerlerinde on üç bin beş yüz akçede karâr edip ziyâde ile tâlib-i âhar olmamağın zikr olunan ahırı mezbûrân es-Seyyid İbrahim ve Murad Beşe’ye fıddî nakd-i râcî fi’l-vakt on üç bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi vech-i meşrûh üzre ale’s-seviyye iştirâ ve tesellüm eylediklerinden sonra semen-i mezbûr on üç bin beş yüz akçeyi bi’t-tamâm ve’l-kemâl mezbûrân es-Seyyid İbrahim ve Murad Beşe yedlerinden ahz ve kabz eyledik. Ba‘de’l-yevm zikr olunan ahır mezbûrân es-Seyyid İbrahim ve Murad Beşe’nin ale’l-iştirâki’s-seviy [mülk-i] müşterâlar[ı] olmuşdur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Hüseyin Efendi b. Mehmed el-İmâm, Ebûbekir b. Bayram, el-Hâc Receb b. Hamza, Hasan Beşe b. Hüseyin, Mahmud b. Abdullah, Süleyman b. Mehmed, Mehmed b. Abdullah, Abbas Çelebi.