Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 339 Hüküm no: 426 Orijinal metin no: [69b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bülbül b. Gündoğmuş ve eşi Sitti bt. Pîrî’nin ortaklaşa tasarruf ettikleri menzili Mehmed b. Hüseyin ve eşi Âişe bt. Süleyman’a sattıkları Medîne-i Hazret-i Ebî Eyyûb el-Ensârî mahallâtından Evlice Baba mahallesinde sâkin Bülbül b. Gündoğmuş ve zevcesi Sitti bt. Pîrî mahfil-i kazâda râfi‘ü hâze’l-kitâb Mehmed b. Hüseyin ve zevcesi Âişe bt. Süleyman muvâcehelerinde her biri bi’t-tav‘i’s-sâf ikrâr ve i‘tirâf edip işbu akdin sudûruna değin ale’l-iştirâki’s-seviy silk-i mülk-i sahîhimde münselik olup mahalle-i merkūmede vâki‘ bir tarafdan yine kendi mülkümüz ve bir tarafdan karcı Mustafa Çelebi mülkü ve bir tarafdan Keyvan b. Abdullah mülkü ve taraf-ı râbi‘den vâdi ile mahdûd bir bâb fevkānî odayı ve sundurmayı ve altında ahırı ve merkūm Keyvan ile müşterek bi’r-i mâyı ve zât eşcâr-ı müsmire ve gayr-ı müsmire bahçeyi müştemil menzilimizi, mezbûrân Mehmed ve Âişe’ye fıddî nakd-i râyic fi’l-vakt dört bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip onlar dahi ale’l-iştirâki’s-seviy vech-i muharrer üzre iştirâ ve kabûl eylediklerinden sonra meblağ-ı mezbûr dört bin beş yüz akçeyi bi tamâmihî yedlerinden ahz ve kabz edip mebî‘-i mahdûd-ı merkūmu teslîm eyledik. Ba‘de’l-yevm menzil-i mahdûd-ı merkūm mezbûrân Mehmed ve Âişe’nin ber vech-i iştirâk mülk-i müşterâları olmuşdur dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mehmed Efendi b. Mehmed el-İmâm, Ömer Halîfe b. Musa el-Müezzin, Mustafa Halîfe b. Şaban el-Müezzin, Mehmed Halîfe b. Ahmed el-Müezzin, Mehmed b. Şaban, Yakub b. Kurd, Mahmud b. Ahmed ve gayruhüm.