Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 339 Hüküm no: 427 Orijinal metin no: [69b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Niko v. Dimo’nun menzilini Niko v. Mihal’e sattığı Vilâyet-i Rumeli’nde Delvine sancağında Mazaraki kazâsına tâbi‘ Leşviçe nâm karye sâkinlerinden Niko v. Dimo nâm zimmî mahfil-i kazâda işbu râfi‘ü’l-kitâb Niko v. Mihal nâm zimmî muvâcehesinde bi’t-tav‘i’s-sâf ikrâr ve i‘tirâf edip işbu akdin sudûruna değin silk-i mülk-i sahîhimde münselik olup karye-i mezbûrede vâki‘ bir tarafdan Yani v. Duka mülkü ve bir tarafdan diğer Yani v. Nika mülkü ve bir tarafdan Dimo v. Kavani mülkü ve bir tarafdan ba‘zan Yorgo v. Liko mülkü ve ba‘zan tarîk-i âm ile mahdûd bir bâb tahtânî odayı ve bir bâb fevkānî odayı ve zât eşcâr-ı müsmire ve gayr-ı müsmire bahçeyi müştemil olan mülk menzilimi âmme-i tevâbi‘ ve levâhıkı ile mezbûr Niko’ya fıddî nakd-i râyic fi’l-vakt beş bin üç yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ edip ol dahi vech-i muharrer üzre iştirâ ve kabûl eyledikden sonra meblağ-ı merkūm beş bin üç yüz akçeyi bi tamâmihî yedinden ahz ve kabz edip menzil-i mahdûdu mahallinde zabt ve tasarrufa müşterî-i merkūm Niko’yu taslît eyledim ba‘de’l-yevm zikr olunan menzil merkūm Niko’nun mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Yakub b. Kurd, Mahmud b. Ahmed, Mustafa b. Ahmed, Dimo [v.] Komino, Yorgo [v.] Sinori, Yorgo [v.] Haliki, Mihal, Niko v. Haliki, Minho, Papa Roni, Yorgo, Yorgo [v.] Çapani, Yani [v.] Yorgaki ve gayruhüm.