Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 340 Hüküm no: 428 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Angeli v. Manol’ün kira bedelini Bakkal Süleyman’a ödemesi Medîne-i Hazret-i Ebî Eyyûb el-Ensârî mahallâtından Câmi‘-i Kebîr mahallesi sâkinlerinden bakkal Süleyman nâm kimesne meclis-i şer‘a Kızıl Mescid çarşısı’nda ekmekçi olan Angel[i] v. Manol nâm zimmîyi ihzâr ve mahzarında üzerine takrîr-i da‘vâ edip medîne-i mezbûrede Yoğurtçular sûkunda vâki‘ olup sâbıkan mezbûr Angeli’ye yevmî otuz üçer akçeye îcâr eylediğimiz ekmekçi fırınının icâresinden zimmetinde üç aylık icâreden cem‘an iki bin dokuz yüz doksan yedi akçe hakkım kalmışdır suâl olunup alıverilmek matlûbumdur dedikde gıbbe’s-suâl mezbûr Angeli cevâbında, mezbûr Süleyman’a zikr olunan fırının icâresinden zimmetimde vech-i meşrûh üzre ancak iki aylık icâr[d]an cem‘an bin dokuz yüz doksan sekiz akçe kalmışdır deyicek ikrârı mûcebince meblağ-ı mezbûru edâya tenbîh olunup mâ vaka‘a bi’t-taleb ketb olundu. Tahrîren fi’l-yevmi’s-sâdis ve’l-ışrîn târihuhu’l-mezbûr. Şuhûdü’l-hâl: Mustafa Efendi b. ( ) el-İmâm, Receb Efendi b. Abdi, Mahmud b. Ahmed, Mustafa b. Veli, Yakub b. Kurd.