Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 340 Hüküm no: 429 Orijinal metin no: [70a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkâdir Efendi b. Şeyh Ali’nin borcuna karşılık menzilini rehin vermesi Mahmiye-i Kostantıniyye mahallâtından Uzun Yusuf mahallesi sükkânından fahrü’l-kuzât Abdülkādir Efendi b. eş-Şeyh Ali el-Kadı mahfil-i kazâda Abdülfettâh Efendi nâm müteveffânın Halime nâm sagīresi malından vasîsi olan Mehmed Efendi yedinden kabz eylediği otuz altı bin akçe deynine tarafeynden emr ve kabûlü hâvî kefâletle kefîl bi’l-mâl olan ashâb-ı hâze’l-kitâb zahrü’l-kuzât es-Seyyid Ömer Efendi b. es-Seyyid Osman ve fahrü’l-hutebâ Osman Efendi b. Osman ve Mehmed Çelebi b. Yusuf muvâcehelerinde bi tav‘ihî ikrâr ve i‘tirâf edip mahalle-i mezbûrede vâki‘ ma‘lûmü’l-hudûd olup meblağ-ı merkūm otuz altı bin akçe deynim mukābelesinde rehin vaz‘ eylediğim mülk menzilimi, semeni misli ile bey‘ edip semeninden meblağ-ı merkūm otuz altı bin akçeyi vasiyy-i mezbûra edâya azl ve in‘izâlden masûne "küllemâ azeltüke fe-ente vekîlî" mazmûnunu hâviye vekâlet-i devriye ile küfelâ-yı mezbûrûndan her birini tarafımdan vekîl nasb etmişdir eğer meblağ-ı merkūm otuz altı bin akçeyi târih-i kitâbdan üç sene tamâmına değin vasiyy-i merkūm Mehmed Efendi’ye edâ edemezsem merkūmûn es-Seyyid Ömer Efendi ve Osman Efendi ve Mahmud Çelebi vekâlet-i mahkiyeleri hasebiyle menzil-i mezbûru semeni misli ile bey‘ edip semeninden meblağ-ı mezbûr otuz altı bin akçeyi vasiyy-i mezkûr Mehmed Efendi’ye edâ eylesinler dedikde mezbûrûn es-Seyyid Ömer Efendi ve Osman Efendi ve Mehmed Çelebi her biri vekâlet-i merkūmeyi kabûl ve hizmet-i lâzımesin edâya müte‘ahhid olduklarında mâ hüve’l-vâki‘ ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene seb‘a ve erba‘în ve elf. Şeyh Mehmed Efendi b. Pîrî, İshak Çelebi b. Veli el-İmâm, Murtaza Halîfe b. Mehmed, Abdülbâkī Çelebi b. ( ) el-Müderris, Kenan b. Abdullah, Oruc b. Osman, Yusuf b. Abdullah, Hüseyin Çelebi b. Abdi, Ahmed Çelebi.