Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 341 Hüküm no: 430 Orijinal metin no: [70a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Çelebi b. Abdullah’ın varislerinin sulh olması Mahmiye-i İstanbul’da merhûm Mahmud Paşa câmi‘-i şerîfi kurbunda vâki‘ Cezerî Kasım Paşa mahallesinde sâkin iken bundan akdem vefât eden merhûm Yusuf Çelebi b. Abdullah nâm müteveffânın verâseti sulbiye-i kebîre kızları Hatice ve Râbia nâm hâtunlara münhasıra olduğu şer‘an mütebeyyin oldukdan sonra mezbûre Hatice Hâtun tarafından sulh-i âti’z-zikre vekîl olup hasm-ı câhid mahzarında nehc-i şer‘î üzre vekâleti sâbite olan fahrü’l-kuzât Ahmed Efendi b. Mehmed mahfil-i kazâda müteveffâ-yı mezbûrun muhallefâtına vâzı‘atü’l-yed olan râfi‘at-i hâze’l-kitâb mezbûre Râbia Hâtun tarafından dahi müsâlaha-i âtiyetü’l-beyâna vekîl olup mezbûreyi ma‘rifet-i şer‘iyye ile ârifeyn olan Abdurrahman Çelebi b. Abdülhay ve Abdurrahman Bey b. Mehmed şehâdetleri ile şer‘an vekâleti sâbite olan Fahrü’l-akrân Osman Ağa b. Mahmud Ağa mahzarında bi’l-vekâle ikrâr ve i‘tirâf edip merkūme Râbia Hâtun’un hâlâ taht-ı yedinde olan on altı bin beş yüz akçe kıymetli Gülistan [nâm] câriyenin semeninin altı bin beş yüz akçesi kendi malı ve on bin akçesi babası müteveffâ-yı mezbûr Yusuf Çelebi’nin malı olup müşterek olduklarını bundan akdem şuhûd-ı udûl ile isbât eylediğimizde müvekkilem mezbûre Hatice Hâtun’un hisse-i irsiyyesi olan beş bin akçe hükm ve hüccet olunmuşidi el-hâletü hâzihî beynimizde muslihûn tavassut edip meblağ-ı mezbûr beş bin akçeyi üç bin akçe üzerine sulh eylediklerinde ben dahi vekâletim hasebiyle sulh-i mezbûru kabûl ve bedel-i sulh olan meblağ-ı merkūm üç bin akçeyi vekîl-i mûmâ-ileyh Osman Ağa yedinden bi tamâmihî ahz ve kabz eyledim ba‘de’l-yevm meblağ-ı mezbûr beş bin akçeye müte‘allik mezbûre Râbia Hâtun ile müvekkilem mezbûre Hatice Hâtun’un vechen mine’l-vücûh da‘vâ ve nizâ‘ı kalmamışdır dedikde vekîl-i mezbûr Ahmed Efendi’nin vech-i muharrer üzre bi’l-vekâle cârî olan ikrâr-ı meşrûhunu vekîl-i âhar Osman Ağa bi’l-vekâle vicâhen tasdîk ve şifâhen tahkīk edicek mâ hüve’l-vâki‘ ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Zahrü’l-akrân Mustafa Ağa b. Derviş Ağa, Fahrü’l-cüyûş Mustafa Çavuş b. Halil, Mustafa Çavuş b. Veli, Ahmed Çelebi b. Sâlih.