Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 342 Hüküm no: 431 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Sefer b. Abdullah’ın menzilini Mustafa Çelebi b. Mehmed’e sattığı Mahmiye-i Kostantıniyye mahallâtından İbrahim Paşa mahallesinde sâkin el-Hâc Sefer b. Abdullah nâm kimesne tarafından bey‘-i âti’z-zikri ikrâra vekîl olup hasm-ı câhid mahzarında Yusuf Çelebi b. Mustafa ve Ömer Ağa b. Abdullah şehâdetleri ile şer‘an vekâleti sâbite olan Dilâver Ağa b. Abdullah mahfil-i kazâda işbu râfi‘ü’l-kitâb Mustafa Çelebi b. Ahmed mahzarında bi’l-vekâle ikrâr ve i‘tirâf edip medîne-i Hazret-i Ebî Eyyûb el-Ensârî -radıyallâhu anhu- mahallâtından Yâvedûd mahallesinde vâki‘ bir tarafdan Mehmed b. Ahmed mülkü ve bir tarafdan Râziye Hâtun bt. Abdullah mülkü ve bir tarafdan cidâr-ı hısn ve bir tarafdan tarîk-i âm ile mahdûd olup bir bâb fevkānî beyti ve sofayı ve kenîfi ve bi’r-i mâ ve cüneyneyi müştemil olan mülk menzilini müvekkil-i mezbûr el-Hâc Sefer mezbûr Mustafa Çelebi’ye cümle tevâbi‘ ve levâhıkı ile fıddî nakd-i râyic fi’l-vakt dokuz bin üç yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr dokuz bin üç yüz akçeyi yedinden bi’t-tamâm ve’l-kemâl ahz ve kabz eyledi dedikde vekîl-i mezbûr Dilâver Ağa’nın vech-i muharrer üzre cârî olan ikrârını müşterî-i mezbûr Mustafa Çelebi vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fî selhi Şevvâli’l-mükerrem li sene seb‘a ve erba‘în ve elf. Şuhûdü’l-hâl: Eş-Şeyh Nasrullah Efendi, Fahrü’l-müderrisîn Avnullah Efendi b. Ömer Efendi el-Müsta‘id, Mustafa Çelebi b. Mehmed, Ahmed Çelebi b. ( ) er-Râcil, Mehmed Efendi b. İvaz, Abdi Halîfe b. Selim el-İmâm, Mehmed Efendi el-Kadı.