Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 342 Hüküm no: 432 Orijinal metin no: [70b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey b. Abdullah’ın evini istiğlâl yoluyla Cafer Paşa Vakfı’na sattığı Medîne-i Hazret-i Ebî Eyyûb el-Ensârî mahallâtından Kiremitçi Süleyman mahallesinde sâkin olan Mahmud Bey b. Abdullah nâm kimesne meclis-i şer‘-i şerîfde hâzır olup âtiyyü’z-zikr menzilini, medîne-i merkūmede vâki‘ merhûm Cafer Paşa vakfı’na mütevellî olan hâmil-i hâze’l-kitâb Mehmed Beşe b. Hamza’ya bey‘ ettiğini ikrâr ve i‘tirâf etti. Mütevellî-i mezbûr da vakf-ı merkūm malıyla ve istiğlâl maksadıyla, mezbûr Mahmud Bey’in işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede vâki‘ olan, bir tarafdan İbrahim Ağa mülkü, iki tarafdan menzil-i mevkūf ve diğer tarafdan da tarîk-i âm ile mahdûd bulunan cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt yirmi beş bin akçe semen-i mu‘ayyen-i makbûzla iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr Ramazân-ı mübârek ayının gurresinden üç sene tamâmına on bir bin iki yüz elli akçe ücret ile menzili kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra kızı Fâtıma kıbelinden âtiyyü’l-beyânı ikrâra vekâleti Abdurrahman b. Cafer ve el-Hâc Muslihiddin b. el-Hâc ( ) nâm kimesnelerin şehâdetleri ile sâbit olan mezbûr İbrahim, müvekkile-i mezbûresinin menzil-i mezbûrdaki hissesinin bey‘ine zevcine izin verdikden sonra menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl olduğunu bi’l-vekâle ikrâr etti. Cerâ zâlike ve hurrire fi’l-yevmi’s-sâmin ve’l-ışrîn min Şevvâli’l-mükerrem sene seb‘a ve erba‘în ve elf. Şuhûdü’l-hâl: İmâm Mustafa Çelebi b. Ali, Mahalle-i Sofular İmâmı Bekir Efendi, câbî Abdullah b. İbrahim, Seyyid Mustafa b. Seyyid Mehmed, Mustafa b. Mehmed, Cafer b. Abdullah, Mustafa b. Veli ve gayruhüm