Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 343 Hüküm no: 433 Orijinal metin no: [70b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Manol’ün evini istiğlâl yoluyla Behram Bey Vakfı’na sattığı Mahmiye-i Kostantıniyye mahallâtından el-Hâc İlyas mahallesinde sâkin olan Andriye v. Manol nâm zimmî, meclis-i şer‘-i şerîfde hâzır olup âtiyyü’z-zikr menzilini merhûm Behram Bey vakfı’na mütevellî olan hâmil-i hâze’l-kitâb Hüseyin Halîfe b. Şaban’a bey‘ ettiğini ikrâr ve i‘tirâf etti. Mütevellî-i mezbûr da vakf-ı merkūm malıyla ve istiğlâl maksadıyla, zimmî-i mezbûrun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede vâki‘ olan, bir tarafdan Çiçek Yanaki mülkü, iki tarafdan Abdi Bey’in menzil-i mevkūfu ve diğer tarafdan da tarîk-i âm ile mahdûd bulunan cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt dört bin akçe semen-i mu‘ayyen-i makbûzla iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına bin beş yüz akçe ücret ile menzili kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra mukırr-ı mezbûrun oğlu Mihal, menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fî gurreti Zilka‘de eş-şerîfe sene seb‘a ve erba‘în ve elf. Şuhûdü’l-hâl: Hüseyin Çelebi b. Abdullah, Ali b. Hüdâverdi, Mahmud b. Mustafa, Musa b. Halil, müezzin Şaban b. Hüseyin, İmâm İbrahim Efendi, Mehmed Bey b. Abdullah