Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 344 Hüküm no: 434 Orijinal metin no: [71a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihriban bt. Abdullah’ın terekesinin varisi Mehmed b. Hasan’a teslim edildiği Medîne-i Hazret-i Ebî Eyyûb el-Ensârî mahallâtından Aşçıbaşı mahallesi sâkinlerinden râfi‘ü’l-kitâb Mehmed b. Hasan nâm kimesne meclis-i şer‘a medîne-i mezbûre mahallâtından Süleyman Subaşı mahallesinde sâkin iken bundan akdem müteveffâ olan Yusuf nâm kimesnenin sulbî oğlu [Mehmed] nâm kimesneyi ihzâr ve mahzarında üzerine takrîr-i da‘vâ edip mezbûr Mehmed’in babası merkūm Yusuf’un zevce-i menkûhası olup mezbûr Mehmed ile sâkine iken müteveffât olmağla terekesine merkūm Mehmed vâzı‘ü’l-yed olduğu Mihriban bt. Abdullah nâm Hâtun benim babam merkūm Hasan’ın mu‘takası olup usûbet-i nesebiyye cihetinden verâseti bana münhasıra iken mezbûre Mihriban’ın cümle muhallefâtını merkūm Mehmed kabz etmişdir suâl olunup şer‘an ihkāk-ı hak olunması matlûbumdur dedikde gıbbe’s-suâl mezbûr Mehmed cevâbında, müteveffât-ı mezbûre Mihriban Hâtun mezbûr Mehmed’in babası mezkûr Hasan’ın mu‘takası olduğu ma‘lûmum değildir deyicek müdde‘î-i mezbûr Mehmed’in müdde‘âsına mutâbıka beyyine taleb olundukda udûl-i müslimînden Abdullah Halîfe b. Maden el-İmâm ve İsmail Halîfe b. Mehmed el-Müezzin li ecli’ş-şehâde meclis-i şer‘a hâzırân olup istişhâd olunduklarında her biri edâ-i şehâdet-i şer‘iyye edip fi’l-vâki‘ müteveffât-ı mezbûre Mihriban müdde‘î-i mezbûr Mehmed’in babası mezbûr Hasan’ın mu‘taka câriyesidir verâseti mezbûr Mehmed’e münhasıradır husûs-ı mezbûra minvâl-i meşrûh üzre şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle olmağın müteveffât-ı mezbûre Mihriban’ın muhallefâtını mezbûr Mehmed’e edâya tenbîh birle mâ vaka‘a bi’t-taleb ketb olundu. Fî gurreti şehri Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Taşçı Hüseyin b. Yusuf, Ali b. Mustafa, Mustafa b. Veli, Ali b. Abdullah, Yakub b. Kurd, Ali Çelebi b. Hamza, Cafer b. Ve[li].